കൊച്ചി: അമൽ നീരദ് ചിത്രം ‘ബൊഗെയ്ൻവില്ല’യിലെ സൂപ്പർഹിറ്റ് സ്തുതി ഗാനം ആലപിച്ച നടൻ ടിനി ടോമിന് (Tini Tom) സോഷ്യൽ മീഡിയയിൽ പരിഹാസവും ട്രോളുകളും. ഒരു ടെലിവിഷൻ ഷോയിൽ ഓർക്കസ്ട്രയോടൊപ്പം ആത്മവിശ്വാസത്തോടെ പാടുകയും നൃത്തം ചെയ്യുകയും ചെയ്യുന്ന ടിനിയുടെ വീഡിയോ വൈറലായതോടെയാണ് വിമർശനം കടുത്തിരിക്കുന്നത്. പാട്ടിന്റെ വരികൾ വ്യക്തമാകാത്തതും ആലാപന ശൈലിയുമാണ് ട്രോളന്മാർ പ്രധാനമായും ലക്ഷ്യം വെക്കുന്നത്.
“ഇത് കേട്ടിട്ട് ഞങ്ങൾക്ക് ശ്വാസം മുട്ടുന്നു”, “ബാധ ഒഴിപ്പിക്കൽ ആണോ?”, “സബ് ടൈറ്റിൽ ഉണ്ടോ അണ്ണാ?” എന്നിങ്ങനെ പോകുന്നു വീഡിയോയ്ക്ക് താഴെയുള്ള പരിഹാസ കമന്റുകൾ. സുഷിൻ ശ്യാമിന്റെ സംഗീതത്തിൽ പുറത്തിറങ്ങിയ ഒറിജിനൽ ഗാനത്തിന് വലിയ ആരാധകവൃന്ദമുള്ളതിനാൽ, ടിനിയുടെ ഈ വേർഷൻ ആരാധകർക്ക് ഇടയിൽ വലിയ ചർച്ചയാവുകയാണ്. മുൻപും ടിനി ടോമിന്റെ പാട്ടുകൾ സോഷ്യൽ മീഡിയയിൽ ചർച്ചയായിട്ടുണ്ടെങ്കിലും ഇത്രത്തോളം ട്രോളുകൾ ഇതാദ്യമായാണ്.
2024-ൽ പുറത്തിറങ്ങിയ ‘ബൊഗെയ്ൻവില്ല’യിലെ ഈ ഗാനം സുഷിൻ ശ്യാമും മേരി ആൻ അലക്സാണ്ടറും ചേർന്നാണ് ആലപിച്ചത്. എന്നാൽ ടിനി ടോം ഈ ഗാനം അവതരിപ്പിച്ചത് ‘സ്വയം കോമാളിയാവാനുള്ള ധൈര്യം’ എന്നാണ് പലരും വിശേഷിപ്പിക്കുന്നത്. പരിഹാസങ്ങൾ നിറയുമ്പോഴും ടിനിയുടെ ആത്മവിശ്വാസത്തെ പിന്തുണയ്ക്കുന്നവരും കുറവല്ല.
Summary: Actor Tini Tom’s energetic performance of the hit song ‘Sthuthi’ from the movie Bougainvillea has sparked a wave of trolls and memes on social media.
