തിരുവനന്തപുരം: പ്രണയദിനത്തോട് അനുബന്ധിച്ച് സപ്ലൈകോയിൽ വൻ ഓഫർ. ഫെബ്രുവരി 14-ന് സപ്ലൈകോ ഔട്ട്ലെറ്റുകളിൽ നിന്നും സാധനങ്ങൾ വാങ്ങുന്നവർക്ക് വെറും 14 രൂപയ്ക്ക് ഒരു കിലോ പഞ്ചസാര സ്വന്തമാക്കാം (Supplyco Valentines Day Offer). നിലവിൽ കിലോയ്ക്ക് 43.50 രൂപയുള്ള പഞ്ചസാരയാണ് വാലന്റൈൻസ് ഡേ ഓഫറിന്റെ ഭാഗമായി ഇത്രയും കുറഞ്ഞ വിലയ്ക്ക് നൽകുന്നത്.
1000 രൂപയ്ക്ക് മുകളിൽ സബ്സിഡി ഇല്ലാത്ത (Non-Subsidized) ഉത്പന്നങ്ങൾ വാങ്ങുന്നവർക്കാണ് ഒരു കിലോ പഞ്ചസാര 14 രൂപയ്ക്ക് ലഭിക്കുക.
അഞ്ഞൂറ് രൂപയ്ക്ക് മുകളിൽ: 500 രൂപയ്ക്ക് മുകളിലാണ് സബ്സിഡിയിതര സാധനങ്ങൾ വാങ്ങുന്നതെങ്കിൽ 14 രൂപയ്ക്ക് അരക്കിലോ പഞ്ചസാര ലഭിക്കും. ഫെബ്രുവരി 14-ന് തുടങ്ങുന്ന ഈ ഓഫർ ഫെബ്രുവരി 28 വരെ നീണ്ടുനിൽക്കും.
പ്രണയദിനത്തിൽ കൂടുതൽ ഉപഭോക്താക്കളെ സപ്ലൈകോയിലേക്ക് ആകർഷിക്കുക എന്ന ലക്ഷ്യത്തോടെയാണ് ഈ വ്യത്യസ്തമായ ഓഫർ അവതരിപ്പിച്ചിരിക്കുന്നത്. സബ്സിഡി സാധനങ്ങൾക്ക് പുറമെ സപ്ലൈകോയിലെ മറ്റ് ഉത്പന്നങ്ങളുടെ വിൽപന വർദ്ധിപ്പിക്കാനും ഈ നീക്കം സഹായിക്കുമെന്ന് അധികൃതർ വാർത്താക്കുറിപ്പിൽ അറിയിച്ചു.
