തിരുവനന്തപുരം: ടി20 ലോകകപ്പ് ക്രിക്കറ്റിൽ ഇന്ത്യയെ തുടർച്ചയായ രണ്ടാം തവണയും കിരീടത്തിലേക്ക് നയിച്ച കേരളത്തിന്റെ സ്വന്തം താരം സഞ്ജു സാംസൺ നാട്ടിൽ തിരിച്ചെത്തി (Sanju Samson arrival Thiruvananthapuram airport 2026). തിങ്കളാഴ്ച വൈകുന്നേരം തിരുവനന്തപുരം വിമാനത്താവളത്തിലെത്തിയ സഞ്ജുവിനെ ആവേശകരമായ സ്വീകരണമാണ് ആരാധകർ നൽകിയത്. മുഖ്യമന്ത്രി പിണറായി വിജയൻ സഞ്ജുവിനെ ഫോണിൽ വിളിച്ച് തന്റെയും സംസ്ഥാനത്തിന്റെയും അഭിനന്ദനങ്ങൾ അറിയിച്ചു.
വിദ്യാഭ്യാസമന്ത്രി വി. ശിവൻകുട്ടിയുടെ നേതൃത്വത്തിൽ സഞ്ജുവിനെ സ്വീകരിച്ചു. എ.എ. റഹീം എംപിയും മന്ത്രിയോടൊപ്പമുണ്ടായിരുന്നു.
പ്രിയതാരത്തെ ഒന്നു കാണാൻ ആയിരക്കണക്കിന് ആരാധകരാണ് വിമാനത്താവളത്തിൽ തടിച്ചുകൂടിയത്. ആർപ്പുവിളികളോടെയും വാദ്യമേളങ്ങളോടെയുമാണ് ആരാധകർ സഞ്ജുവിനെ വരവേറ്റത്. തന്നെ എന്നും പിന്തുണച്ച എല്ലാ മലയാളികളോടും ക്രിക്കറ്റ് ആരാധകരോടും നന്ദിയുണ്ടെന്ന് സഞ്ജു മാധ്യമങ്ങളോട് പറഞ്ഞു.
അഹമ്മദാബാദിൽ നടന്ന ഫൈനലിൽ ന്യൂസിലൻഡിനെതിരെ ഇന്ത്യയുടെ വിജയശിൽപിയായത് സഞ്ജുവായിരുന്നു. ടൂർണമെന്റിലുടനീളം മികച്ച ഫോം തുടർന്ന സഞ്ജു ഫൈനലിൽ 46 പന്തിൽ 89 റൺസാണ് അടിച്ചുകൂട്ടിയത്. എട്ട് സിക്സറുകളും അഞ്ച് ഫോറുകളും അടങ്ങുന്നതായിരുന്നു സഞ്ജുവിന്റെ വെടിക്കെട്ട് പ്രകടനം. ലോകകപ്പിലെ ‘പ്ലെയർ ഓഫ് ദി ടൂർണമെന്റ്’ പുരസ്കാരവും സഞ്ജു സ്വന്തമാക്കി.
അതേസമയം , ലോകകപ്പ് ഹീറോ സഞ്ജു സാംസണ് സംസ്ഥാന സർക്കാരിന്റെ ഔദ്യോഗിക സ്വീകരണം തിരുവനന്തപുരത്ത് വെച്ച് നൽകുമെന്ന് മന്ത്രി വി. ശിവൻകുട്ടി അറിയിച്ചു. കായിക ലോകത്ത് കേരളത്തിന്റെ അഭിമാനം ഉയർത്തിയ താരത്തിന് അർഹമായ ആദരം തന്നെ നൽകാനാണ് സർക്കാരിന്റെ തീരുമാനം.
Story Summary :
World Cup hero Sanju Samson received a grand welcome at Thiruvananthapuram airport following India’s T20 World Cup victory. Chief Minister Pinarayi Vijayan congratulated Sanju over the phone for his stellar performance, including his match-winning 89 runs in the final against New Zealand. Education Minister V. Sivankutty and A.A. Rahim MP officially received the cricketer, who was named Player of the Tournament. The state government announced a formal ceremony in Thiruvananthapuram to honor Sanju’s historic achievement.
