കോഴിക്കോട്: പേരാമ്പ്ര മുതുവണ്ണാച്ചയിൽ സിപിഐഎം പ്രവർത്തകൻ കുനീമ്മൽ ദിനേശനെ ആക്രമിച്ച സംഭവത്തിൽ രണ്ട് ബിജെപി പ്രവർത്തകരെ പോലീസ് അറസ്റ്റ് ചെയ്തു (Perambra Crime News). മുതുവണ്ണാച്ച വെള്ളപ്പാലൻകണ്ടി നിതിൻ ആനന്ദ് (38), മീത്തലെ പാറക്കലിൽ പ്രജീഷ് കുമാർ (45) എന്നിവരാണ് പിടിയിലായത്.
കഴിഞ്ഞ ദിവസം രാത്രി വീട്ടിലേക്ക് മടങ്ങുന്നതിനിടെയാണ് ദിനേശന് നേരെ ആക്രമണമുണ്ടായത്. വെള്ളുത്തപറമ്പത്ത് നിന്ന് മുതുവണ്ണാച്ചയ്ക്കുള്ള റോഡിലൂടെ ബൈക്കിൽ സഞ്ചരിക്കവെ വഴിയിൽ വെച്ച് സംഘം തടഞ്ഞുനിർത്തി വെട്ടിപ്പരിക്കേൽപ്പിക്കുകയായിരുന്നു.
ഗുരുതരമായി പരിക്കേറ്റ ദിനേശൻ ഇപ്പോൾ കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലാണ്.
പ്രതികൾ: മൂന്നംഗ സംഘമാണ് ആക്രമണം നടത്തിയതെന്നാണ് സൂചന. അറസ്റ്റിലായ രണ്ട് പേർക്ക് പുറമെ ഒരാളെ കൂടി പിടികൂടാനുണ്ട്. ഇയാൾക്കായി പോലീസ് തിരച്ചിൽ ഊർജ്ജിതമാക്കി.
പിടിയിലായ പ്രതികളെ ഇന്ന് തന്നെ കോടതിയിൽ ഹാജരാക്കും. രാഷ്ട്രീയ വൈരാഗ്യമാണോ ആക്രമണത്തിന് പിന്നിലെന്ന് പോലീസ് പരിശോധിച്ചുവരികയാണ്. സംഭവത്തെത്തുടർന്ന് മേഖലയിൽ പോലീസ് ജാഗ്രത ശക്തമാക്കിയിട്ടുണ്ട്.
