കോഴിക്കോട്: നഗരമധ്യത്തിൽ പോലീസ് ഉദ്യോഗസ്ഥന് നേരെ ഗുണ്ടാ ആക്രമണം. കോഴിക്കോട് ടൗൺ സ്റ്റേഷനിലെ എസ്.ഐ ഷാഫിക്കാണ് കുത്തേറ്റത് (Kozhikode Town SI Stabbed). സംഭവത്തിൽ വെസ്റ്റ്ഹിൽ സ്വദേശിയും നിരവധി ക്രിമിനൽ കേസുകളിൽ പ്രതിയുമായ പ്രമോദിനെ പോലീസ് കസ്റ്റഡിയിലെടുത്തു.
ടൗൺ പോലീസ് സ്റ്റേഷന് മുൻവശത്തുള്ള ഹോട്ടലിൽ ചായ കുടിക്കാനെത്തിയതായിരുന്നു എസ്.ഐ ഷാഫി. ഈ സമയം ഹോട്ടൽ ജീവനക്കാരനും പ്രതിയായ പ്രമോദും തമ്മിൽ വാക്കേറ്റം നടക്കുന്നുണ്ടായിരുന്നു. ഹോട്ടലിൽ ബഹളമുണ്ടാക്കരുതെന്ന് എസ്.ഐ പ്രമോദിനോട് ആവശ്യപ്പെട്ടു. ഇതിൽ പ്രകോപിതനായ പ്രതി എസ്.ഐയോട് തട്ടിക്കയറുകയും തുടർന്ന് അദ്ദേഹം പുറത്തേക്ക് ഇറങ്ങുന്നതിനിടെ പിന്നിൽ നിന്ന് കുത്തുകയുമായിരുന്നു.
കുത്തേറ്റ എസ്.ഐയെ ഉടൻ തന്നെ സമീപത്തെ സ്വകാര്യ ആശുപത്രിയിൽ പ്രവേശിപ്പിച്ചു. അദ്ദേഹത്തിന്റെ പരിക്കുകൾ സാരമുള്ളതല്ലെന്നാണ് പ്രാഥമിക വിവരം. ആക്രമണത്തിന് ശേഷം ഓടി രക്ഷപ്പെടാൻ ശ്രമിച്ച പ്രമോദിനെ നാട്ടുകാർ ചേർന്നാണ് കീഴ്പ്പെടുത്തിയത്. തുടർന്ന് ടൗൺ പോലീസ് ഇയാളുടെ അറസ്റ്റ് രേഖപ്പെടുത്തി.
പ്രതിയായ പ്രമോദ് നേരത്തെയും നിരവധി അക്രമക്കേസുകളിൽ ഉൾപ്പെട്ടയാളാണെന്ന് പോലീസ് അറിയിച്ചു. ഇയാൾക്കെതിരെ വധശ്രമം ഉൾപ്പെടെയുള്ള വകുപ്പുകൾ ചുമത്തി കേസെടുത്തിട്ടുണ്ട്.
