തിരുവനന്തപുരം: കേരളത്തിൽ സൂര്യരശ്മികളിലെ അൾട്രാവയലറ്റ് വികിരണത്തിന്റെ അളവ് വർദ്ധിക്കുന്നതായി റിപ്പോർട്ട് (Kerala UV Index Alert). യുവി ഇൻഡക്സ് എട്ടിൽ എത്തിയ മൂന്നാർ, കോന്നി എന്നിവിടങ്ങളിലാണ് നിലവിൽ ഓറഞ്ച് അലർട്ട് പ്രഖ്യാപിച്ചിരിക്കുന്നത്. സൂചിക ആറ് മുതൽ ഏഴ് വരെ രേഖപ്പെടുത്തിയ എട്ട് കേന്ദ്രങ്ങളിൽ യെല്ലോ അലർട്ടും പുറപ്പെടുവിച്ചു.
അലർട്ടുകൾ എവിടെയെല്ലാം?
ഓറഞ്ച് അലർട്ട് (സൂചിക 8): മൂന്നാർ (ഇടുക്കി), കോന്നി (പത്തനംതിട്ട).
യെല്ലോ അലർട്ട് (സൂചിക 6-7): കൊട്ടാരക്കര, ചെങ്ങന്നൂർ, ചങ്ങനാശ്ശേരി, ഒല്ലൂർ, തൃത്താല, പൊന്നാനി, ബേപ്പൂർ, മാനന്തവാടി.
തുടർച്ചയായി സൂര്യപ്രകാശം ശരീരത്തിൽ ഏൽക്കുന്നത് സൂര്യാതപം (Sunburn), ചർമ്മ രോഗങ്ങൾ, കണ്ണിന് അസ്വസ്ഥതകൾ എന്നിവയ്ക്ക് കാരണമാകും. രോഗപ്രതിരോധ ശേഷി കുറഞ്ഞവർക്കും ചർമ്മരോഗമുള്ളവർക്കും ഇത് കൂടുതൽ അപകടകരമാണ്.
സുരക്ഷാ മുൻകരുതലുകൾ:
പകൽ 10 മണി മുതൽ 3 മണി വരെയാണ് വികിരണതോത് ഏറ്റവും കൂടുതൽ. ഈ സമയത്ത് വെയിൽ നേരിട്ട് ഏൽക്കുന്നത് പരമാവധി ഒഴിവാക്കുക.
ശരീരം മുഴുവൻ മറയുന്ന ഇളം നിറത്തിലുള്ള കോട്ടൺ വസ്ത്രങ്ങൾ ധരിക്കുക. കുട, തൊപ്പി, സൺഗ്ലാസ് എന്നിവ ഉപയോഗിക്കുന്നത് ശീലമാക്കുക.
ബൈക്ക് യാത്രക്കാർ, മത്സ്യത്തൊഴിലാളികൾ, വിനോദസഞ്ചാരികൾ, പുറംജോലികൾ ചെയ്യുന്നവർ എന്നിവർ കൂടുതൽ ശ്രദ്ധിക്കണം.
ദീർഘദൂര യാത്ര ചെയ്യുന്നവർ ഇടവേളകളിൽ തണലിൽ വിശ്രമിക്കാനും ധാരാളം വെള്ളം കുടിക്കാനും ശ്രദ്ധിക്കണം.
മലമ്പ്രദേശങ്ങളിലും ഉഷ്ണമേഖലാ പ്രദേശങ്ങളിലും വികിരണതോത് കൂടുതലായിരിക്കുമെന്നതിനാൽ മലയോര നിവാസികൾ പ്രത്യേക ജാഗ്രത പാലിക്കണമെന്ന് ദുരന്ത നിവാരണ അതോറിറ്റി അറിയിച്ചു.
Story Summary: Kerala faces a rise in UV radiation levels, with Orange Alert issued for Munnar and Konni as the UV Index hit 8. Yellow Alerts are active in eight other locations. Authorities advise the public to avoid direct sunlight between 10 AM and 3 PM and use protective gear like umbrellas and sunglasses to prevent sunburn and skin issues.
