തിരുവനന്തപുരം: സംസ്ഥാന ബജറ്റ് പ്രഖ്യാപനങ്ങളും സർക്കാരിന്റെ വിവിധ നയപരമായ തീരുമാനങ്ങളും തടസ്സങ്ങളില്ലാതെ കൃത്യമായി ഏകോപിപ്പിക്കുന്നതിനും സമയബന്ധിതമായി നടപ്പാക്കുന്നതിനുമായി ചീഫ് സെക്രട്ടറിയുടെ നേരിട്ടുള്ള നിയന്ത്രണത്തിൽ പ്രത്യേക ഡിവിഷൻ രൂപീകരിച്ച് ഉത്തരവായി (Coordination and program management division kerala). ‘ഏകോപന, പ്രോഗ്രാം മാനേജ്മന്റ് ഡിവിഷൻ’ (Coordination and Program Management Division – CPMD) എന്നാണ് ഈ പുതിയ സംവിധാനത്തിന്റെ പേര്. വിവിധ സർക്കാർ വകുപ്പുകൾ തമ്മിലുള്ള ഏകോപനം കൂടുതൽ ശക്തമാക്കി, ജനക്ഷേമ പദ്ധതികളും നയപ്രഖ്യാപനങ്ങളും ഒട്ടും വൈകാതെ ജനങ്ങളിലേക്ക് എത്തിക്കുകയാണ് ഇതിലൂടെ ലക്ഷ്യമിടുന്നത്. പ്രിൻസിപ്പൽ സെക്രട്ടറി പദവിയിൽ കുറയാത്ത മുതിർന്ന ഐ.എ.എസ് ഉദ്യോഗസ്ഥനായിരിക്കും ഈ ഡിവിഷന്റെ പൂർണ്ണ ചുമതല നിർവ്വഹിക്കുക.
അടിസ്ഥാന സൗകര്യവികസനം, വ്യവസായം, ഗതാഗതം, ലോജിസ്റ്റിക്സ്, നിക്ഷേപ സൗകര്യം പ്രോത്സാഹിപ്പിക്കൽ, പൊതുസേവനം എന്നീ അതീവ പ്രാധാന്യമുള്ള മേഖലകളിലെ പ്രോജക്ടുകൾ വേഗത്തിൽ നടപ്പാക്കാനും വകുപ്പുകൾ നേരിടുന്ന സാങ്കേതിക വെല്ലുവിളികൾ പരിഹരിക്കാനുമുള്ള ഒരു കേന്ദ്രീകൃത നോഡൽ സംവിധാനമായാണ് സിപിഎംഡി പ്രവർത്തിക്കുക.
നിലവിൽ പദ്ധതികൾ നടപ്പാക്കുന്ന വിവിധ വകുപ്പുകളിലെ സെക്ഷനുകളുമായി പൂർണ്ണമായി സഹകരിച്ചായിരിക്കും ഈ പുതിയ ഡിവിഷന്റെ പ്രവർത്തനം. വകുപ്പുകൾ തമ്മിലുള്ള ആശയക്കുഴപ്പങ്ങൾ, ഫയൽ ചുവപ്പുനാടകൾ, മറ്റ് ഭരണപരമായ തടസങ്ങൾ എന്നിവ പൂർണമായും പരിഹരിച്ച് സർക്കാർ തീരുമാനങ്ങൾക്ക് വേഗത കൂട്ടാൻ ഇതിലൂടെ സാധിക്കും. ഇത്തരം വകുപ്പുതല തർക്കങ്ങൾക്ക് ചീഫ് സെക്രട്ടറി തലത്തിൽ ഉടനടി അന്തിമ പരിഹാരമുണ്ടാക്കും.
പ്രത്യേക പ്രോഗ്രാം രജിസ്ട്രികൾ, ഡിജിറ്റൽ ഡാഷ്ബോർഡുകൾ, കൃത്യമായ ഇടവേളകളിലുള്ള അവലോകന യോഗങ്ങൾ എന്നിവയിലൂടെ ഡിവിഷൻ മേൽനോട്ടം വഹിക്കുന്ന പദ്ധതികളുടെ പുരോഗതി കൃത്യമായി അളക്കും. സർക്കാർ നയങ്ങളും ബജറ്റ് വിഹിതങ്ങളും ഘടനാനുസൃതമായി വിനിയോഗിക്കുന്നതിന് ആവശ്യമായ ആധുനിക സാങ്കേതിക പിന്തുണയും ഇതിലൂടെ ലഭ്യമാക്കും. വകുപ്പുകൾക്ക് കീഴിൽ പുരോഗമിക്കുന്ന പദ്ധതികളുടെ പൂർണ്ണ വിവരങ്ങൾ അടങ്ങിയ സമഗ്രമായ ഒരു പ്രോജക്ട് രജിസ്ട്രിയും ഡിവിഷൻ ഉടൻ പുറത്തിറക്കും.
കേരളത്തിന്റെ ദീർഘകാല ലക്ഷ്യമായ ‘വിഷൻ 2031’ വികസന പ്രവർത്തനങ്ങൾ, സർക്കാരിന്റെ വിവിധ നൂറുദിന കർമ്മ പരിപാടികൾ എന്നിവയുടെ അന്തിമ ഏകോപന ചുമതലയും ഇനി ഈ ഡിവിഷനായിരിക്കും. ഒന്നിലധികം വകുപ്പുകളുടെ സംയുക്ത സഹകരണം ആവശ്യമുള്ള വൻകിട പദ്ധതികളുടെ നിർവ്വഹണത്തിന് സിപിഎംഡി നേരിട്ട് മുൻകൈയെടുക്കും. ഇതിനുപുറമെ, കേന്ദ്ര സർക്കാർ സ്ഥാപനങ്ങളുമായും വിവിധ അന്താരാഷ്ട്ര ഏജൻസികളുമായും സഹകരിച്ചു പുതിയ വികസന പദ്ധതികൾ രൂപവത്കരിക്കാനും കേന്ദ്ര ഫണ്ടുകൾ സമയബന്ധിതമായി നേടിയെടുക്കാനും സർക്കാരിനെ സഹായിക്കുന്ന പ്രധാന നോഡൽ ഏജൻസിയായും ഈ ഡിവിഷൻ മാറും. പാർലമെന്റ് സമ്മേളനങ്ങൾക്ക് മുന്നോടിയായി സംസ്ഥാനത്ത് നിന്നുള്ള എം.പിമാർക്കായി നടത്തുന്ന പ്രത്യേക പരിശീലന പരിപാടികളും കൂടിയാലോചനകളും ഇനി മുതൽ സിപിഎംഡി മുഖേനയായിരിക്കും ഏകോപിപ്പിക്കുക.
Story Summary: The Kerala government has ordered the formation of the Coordination and Program Management Division (CPMD) under the Chief Secretary to ensure the timely implementation of budget announcements and policy decisions. Headed by an IAS officer of Principal Secretary rank, the division will act as a centralized system to resolve inter-departmental issues, oversee the Vision 2031 goals, and serve as a nodal agency for central funds and project tracking.
