ന്യൂഡൽഹി: കെ.പി.സി.സി മുൻ പ്രസിഡന്റും കണ്ണൂർ എം.പി.യുമായ കെ. സുധാകരന് പൂർണ്ണ പിന്തുണയുമായി എ.ഐ.സി.സി ജനറൽ സെക്രട്ടറി കെ.സി. വേണുഗോപാൽ (KC Venugopal Facebook Post). സുധാകരൻ ബിജെപിയിലേക്ക് പോകുമെന്ന തരത്തിൽ ഉയർന്ന അഭ്യൂഹങ്ങൾക്കും അനാരോഗ്യകരമായ ചർച്ചകൾക്കും മറുപടിയാണ് അദ്ദേഹം കോൺഗ്രസ് അധ്യക്ഷൻ മല്ലികാർജുൻ ഖാർഗെയുമായും രാഹുൽ ഗാന്ധിയുമായും നടത്തിയ കൂടിക്കാഴ്ചയെന്ന് കെ.സി. വേണുഗോപാൽ പറഞ്ഞു. ഫേസ്ബുക്കിലൂടെയായിരുന്നു അദ്ദേഹത്തിന്റെ വൈകാരികമായ പ്രതികരണം.
“മരണം വരെ കെ. സുധാകരൻ അടിമുടി കോൺഗ്രസുകാരനായിരിക്കും. അദ്ദേഹത്തിന്റെ പാർട്ടിയോടുള്ള അചഞ്ചലമായ കൂറും വിശ്വാസ്യതയും ആർക്കും ചോദ്യം ചെയ്യാവുന്നതിന് അപ്പുറമാണ്,” വേണുഗോപാൽ കുറിച്ചു. തിരഞ്ഞെടുപ്പിൽ മത്സരിക്കുന്നതുമായി ബന്ധപ്പെട്ടും സുധാകരന്റെ രാഷ്ട്രീയ നിലപാടുകളെക്കുറിച്ചും ഉയർന്ന അനാവശ്യ വിവാദങ്ങൾക്ക് ഇതോടെ വിരാമമായെന്നും അദ്ദേഹം വ്യക്തമാക്കി. സുധാകരന്റെ സേവനങ്ങളെ പാർട്ടി വലിയ മുതൽകൂട്ടായാണ് കാണുന്നതെന്നും നേതൃത്വം അദ്ദേഹത്തെ ഹൃദയത്തോട് ചേർത്തുപിടിക്കുന്നുവെന്നും വേണുഗോപാൽ കൂട്ടിച്ചേർത്തു.
കഴിഞ്ഞ കുറച്ച് ദിവസങ്ങളായി കെ. സുധാകരനെതിരെ ഉയർന്ന രാഷ്ട്രീയ ആരോപണങ്ങൾ അദ്ദേഹത്തെ ഏറെ വേദനിപ്പിച്ചിരുന്നുവെന്നും വേണുഗോപാൽ സൂചിപ്പിച്ചു. ഡൽഹിയിലെ കൂടിക്കാഴ്ചയ്ക്ക് ശേഷം ആത്മവിശ്വാസത്തോടെയാണ് സുധാകരൻ മടങ്ങിയത്. വരാനിരിക്കുന്ന നിയമസഭാ തിരഞ്ഞെടുപ്പിൽ യു.ഡി.എഫ് സ്ഥാനാർത്ഥികളുടെ വിജയത്തിനായി അദ്ദേഹം സജീവമായി രംഗത്തുണ്ടാകുമെന്നും കോൺഗ്രസ് നേതൃത്വം ഉറപ്പുനൽകുന്നു.
Summary: AICC General Secretary K.C. Venugopal backed K. Sudhakaran, stating that his loyalty to the Congress is unquestionable. Following Sudhakaran’s meeting with Mallikarjun Kharge and Rahul Gandhi in Delhi, Venugopal posted on Facebook that the meeting puts an end to all unhealthy rumors and speculations. He emphasized that Sudhakaran will remain a Congressman until his last breath and his contributions are highly valued by the party leadership.
