Follow on Google News
കണ്ണൂർ: അഞ്ചരക്കണ്ടി കണ്ണൂർ ഡെന്റൽ കോളേജിലെ ഫൈനൽ ഇയർ വിദ്യാർത്ഥി ആർ.എൽ. നിതിൻ രാജിന്റെ ആത്മഹത്യയുമായി ബന്ധപ്പെട്ട് ആരോപണവിധേയനായ ഓറൽ പതോളജി വിഭാഗം മേധാവി ഡോ. കെ. റാമിനെ കോളേജ് മാനേജ്മെന്റ് ജോലിയിൽ നിന്നും പുറത്താക്കി (Nithin Raj Suicide Case). വ്യാഴാഴ്ചയാണ് മാനേജ്മെന്റ് ഇത് സംബന്ധിച്ച ഔദ്യോഗിക അറിയിപ്പ് പുറത്തുവിട്ടത്.
നിതിൻ രാജിന്റെ മരണത്തിന് പിന്നാലെ കോളേജിൽ വിദ്യാർത്ഥികൾ വലിയ തോതിലുള്ള പ്രക്ഷോഭം നടത്തിയിരുന്നു. നിതിന്റെ ആത്മഹത്യയ്ക്ക് മുൻപും ഡോ. റാമിനെതിരെ നിരവധി പരാതികൾ ഉയർന്നിരുന്നു. മാനസിക പീഡനം, മാർക്ക് കുറയ്ക്കുമെന്ന് ഭീഷണിപ്പെടുത്തൽ തുടങ്ങിയ ഗുരുതരമായ ആരോപണങ്ങളാണ് വിദ്യാർത്ഥികൾ ഉന്നയിച്ചിരുന്നത്.ഡോ. റാമിനൊപ്പം ആരോപണവിധേയയായ ഡോ. സംഗീത നമ്പ്യാർക്കെതിരെയുള്ള കൂടുതൽ നടപടികൾ വിശദമായ അന്വേഷണത്തിന് ശേഷം മതിയെന്ന് മാനേജ്മെന്റ് തീരുമാനിച്ചു. നിലവിൽ ഇവരെ സസ്പെൻഡ് ചെയ്തിരിക്കുകയാണ്.
നിതിന്റെ മരണവുമായി ബന്ധപ്പെട്ട് പോലീസ് ഡോ. റാമിനെതിരെ രണ്ട് പ്രധാന കേസുകളാണ് രജിസ്റ്റർ ചെയ്തിരിക്കുന്നത്. ആത്മഹത്യാപ്രേരണാക്കുറ്റം കൂടാതെ പട്ടികജാതി-പട്ടികവർഗ അതിക്രമ നിരോധന നിയമവും (SC/ST Act) ചുമത്തിയിട്ടുണ്ട്. ആന്ധ്രാപ്രദേശ് സ്വദേശിയായ ഡോ. റാം നിലവിൽ ഒളിവിലാണ്. ഇയാൾക്കായി ലുക്ക് ഔട്ട് നോട്ടീസ് ഉൾപ്പെടെയുള്ള നടപടികളുമായി പോലീസ് തിരച്ചിൽ ഊർജ്ജിതമാക്കിയിട്ടുണ്ട്.
Story Summary: Following intense student protests over the suicide of student Nithin Raj, Kannur Dental College has dismissed Dr. K. Ram. The police have charged the absconding professor with abetment of suicide and under the SC/ST Act.
