Follow on Google News
തിരുവനന്തപുരം: കേരളം വിധിയെഴുതുന്ന വോട്ടെടുപ്പ് ദിനത്തിലും കരുണയുടെ വലിയൊരു മാതൃകയുമായി ഒരു കുടുംബം (Jeyi Jayakumar Organ Donation). തിരുവനന്തപുരത്ത് മസ്തിഷ്കമരണം സ്ഥിരീകരിച്ച 35 വയസ്സുകാരി ജയി ജയകുമാറിന്റെ അവയവങ്ങൾ ദാനം ചെയ്തു. കഴക്കൂട്ടം ടെക്നോ പാർക്കിലെ ഐടി കമ്പനി ജീവനക്കാരിയായിരുന്നു ജയി.
ജയി ജയകുമാറിന്റെ ഹൃദയം, കിഡ്നികൾ, കരൾ, കണ്ണുകൾ എന്നിങ്ങനെ അഞ്ചോളം അവയവങ്ങളാണ് ദാനം ചെയ്യുന്നത്. ആത്മഹത്യാശ്രമത്തെത്തുടർന്ന് ചികിത്സയിലായിരുന്ന ജയിയുടെ മസ്തിഷ്കമരണം ഡോക്ടർമാർ സ്ഥിരീകരിച്ചതോടെ കുടുംബം അവയവദാനത്തിന് സന്നദ്ധത അറിയിക്കുകയായിരുന്നു.
തിരുവനന്തപുരം കിംസ് ആശുപത്രിയിൽ നിന്ന് ശേഖരിച്ച ഹൃദയം കൊച്ചിയിലെ ലിസി ആശുപത്രിയിലേക്കാണ് എത്തിക്കുന്നത്. ദൂരക്കൂടുതലും സമയത്തിന്റെ പ്രാധാന്യവും കണക്കിലെടുത്ത് സംസ്ഥാന സർക്കാരിന്റെ സഹായത്തോടെ എയർ ആംബുലൻസ് വഴിയാണ് ഹൃദയം കൊച്ചിയിലേക്ക് കൊണ്ടുപോകുന്നത്.ഹൃദയം ആശുപത്രിയിൽ നിന്ന് വിമാനത്താവളത്തിലേക്കും തിരിച്ചും വേഗത്തിൽ എത്തിക്കാൻ പോലീസ് പ്രത്യേക ഗ്രീൻ ചാനൽ സൗകര്യം ഒരുക്കിയിരുന്നു.
കൊച്ചിയിലെ ലിസി ആശുപത്രിയിൽ പ്രശസ്ത ഹൃദയശസ്ത്രക്രിയ വിദഗ്ധൻ ഡോ. ജോസ് ചാക്കോ പെരിയപ്പുറത്തിന്റെ നേതൃത്വത്തിലുള്ള സംഘമാണ് ഹൃദയമാറ്റ ശസ്ത്രക്രിയയ്ക്ക് നേതൃത്വം നൽകുന്നത്. വോട്ടെടുപ്പ് തിരക്കുകൾക്കിടയിലും അവയവ കൈമാറ്റത്തിനുള്ള എല്ലാ സൗകര്യങ്ങളും സർക്കാർ വേഗത്തിൽ ഏകോപിപ്പിച്ചു.
മരണശേഷവും മറ്റൊരാളിലൂടെ ജീവിക്കുകയെന്ന ജയിയുടെയും കുടുംബത്തിന്റെയും തീരുമാനം നാടിന് വലിയൊരു മാനുഷിക മാതൃകയാണ് പകരുന്നത്.
Story Summary:
In a noble gesture on the day of the Kerala Assembly elections, the family of 35-year-old Jeyi Jayakumar, an IT professional from Technopark, donated her organs following her brain death. Jeyi’s heart was transported from KIMS Hospital, Thiruvananthapuram, to Lissy Hospital, Kochi, via an air ambulance with the support of the state government. A green channel was provided by the police for swift transport. Her kidneys, liver, and eyes were also donated. The heart transplant surgery in Kochi is being led by Dr. Jose Chacko Periappuram.
