തിരുവനന്തപുരം: ആഗോള അയ്യപ്പ സംഗമത്തിന്റെ വരവ്-ചെലവ് കണക്കുകളെച്ചൊല്ലിയുള്ള വിവാദങ്ങളിൽ വിശദീകരണവുമായി തിരുവിതാംകൂർ ദേവസ്വം ബോർഡ് (Global Ayyappa Sangamam Controversy). ഓഡിറ്റ് റിപ്പോർട്ടിൽ ‘നന്ദഗോവിന്ദം ഭജൻസ്’ എന്ന സംഘത്തിന് എട്ട് ലക്ഷം രൂപ നൽകിയതായി രേഖപ്പെടുത്തിയത് അശ്രദ്ധ മൂലം പറ്റിയ പിശകാണെന്ന് ബോർഡ് വാർത്താക്കുറിപ്പിൽ അറിയിച്ചു. യഥാർത്ഥത്തിൽ ഇഷാൻ ദേവും സംഘവുമാണ് പരിപാടി അവതരിപ്പിച്ചത്. 35-ഓളം കലാകാരന്മാർ പങ്കെടുത്ത പരിപാടിയുടെ അഞ്ച് ദിവസത്തെ താമസവും ഭക്ഷണവും ഉൾപ്പെടെയുള്ള ചെലവുകൾക്കായാണ് ഈ തുക ഉപയോഗിച്ചതെന്നും ബോർഡ് വ്യക്തമാക്കി.
സംഗമത്തിന്റെ പേരിൽ മുഖ്യമന്ത്രിക്ക് കട്ടിൽ വാങ്ങിയെന്ന തരത്തിൽ പ്രചരിക്കുന്ന വാർത്തകൾ പൂർണ്ണമായും അടിസ്ഥാനരഹിതമാണെന്നും ദേവസ്വം ബോർഡ് അറിയിച്ചു. സ്പെഷ്യൽ കമ്മീഷണർ കോടതിയിൽ സമർപ്പിച്ച റിപ്പോർട്ടിലോ ദേവസ്വം ഓഡിറ്റ് റിപ്പോർട്ടിലോ ഇത്തരമൊരു പരാമർശമില്ല. സ്പോൺസർഷിപ്പ് തുക ലഭിക്കാൻ വൈകിയതിനാലാണ് ബഡ്ജറ്റിൽ നിന്ന് തുക മുൻകൂറായി എടുക്കേണ്ടി വന്നതെന്നും കോടതിയിൽ വേഗത്തിൽ റിപ്പോർട്ട് നൽകേണ്ടി വന്നതാണ് ആശയക്കുഴപ്പങ്ങൾക്ക് കാരണമായതെന്നും ബോർഡ് വിശദീകരിക്കുന്നു.
അതേസമയം, ആഗോള അയ്യപ്പ സംഗമത്തിന്റെ കണക്കുകൾ സംബന്ധിച്ച് നിയമസഭയെ തെറ്റിദ്ധരിപ്പിച്ചുവെന്ന് ആരോപിച്ച് ദേവസ്വം മന്ത്രിക്കെതിരെ അവകാശലംഘന നോട്ടീസ് നൽകുമെന്ന് രമേശ് ചെന്നിത്തല അറിയിച്ചിട്ടുണ്ട്. 5 കോടി രൂപ വകയിരുത്തിയ പരിപാടിയിൽ ഏകദേശം 3.4 കോടി രൂപയുടെ നഷ്ടം സംഭവിച്ചതായാണ് ഓഡിറ്റ് റിപ്പോർട്ടിലെ കണ്ടെത്തൽ. ഇത്രയും വലിയ തുകയുടെ നഷ്ടം ഉണ്ടായ സാഹചര്യത്തിൽ സംഭവത്തിൽ ഉന്നതതല അന്വേഷണം വേണമെന്ന ആവശ്യവും ശക്തമാണ്.
Summary: The Travancore Devaswom Board issued a clarification regarding discrepancies in the Global Ayyappa Sangamam audit report, stating that the mention of Nandagovindam Bhajans was a clerical error and denying claims about funds used for the CM’s furniture.
