തൃശൂർ: നിയമസഭാ തിരഞ്ഞെടുപ്പിന് ദിവസങ്ങൾ മാത്രം ബാക്കി നിൽക്കെ, തൃശൂരിൽ വൻതോതിൽ ഭക്ഷ്യക്കിറ്റുകൾ പിടിച്ചെടുത്തു (Thrissur Election News 2026). തൃശൂർ കാച്ചേരിയിലുള്ള ഒരു അച്ചാർ കമ്പനിയിൽ തിരഞ്ഞെടുപ്പ് ഫ്ലയിംഗ് സ്ക്വാഡും പോലീസും സംയുക്തമായി നടത്തിയ പരിശോധനയിൽ 750-ഓളം ഭക്ഷ്യക്കിറ്റുകളാണ് കണ്ടെത്തിയത്. തിരഞ്ഞെടുപ്പ് അട്ടിമറിക്കാനുള്ള നീക്കമാണിതെന്ന് എൽഡിഎഫ് ആരോപിച്ചു.
രഹസ്യവിവരത്തെ തുടർന്ന് ചൊവ്വാഴ്ചയാണ് ഉദ്യോഗസ്ഥർ കാച്ചേരിയിലെ സ്ഥാപനത്തിൽ പരിശോധന നടത്തിയത്. ഈ സ്ഥാപനം ഒരു പ്രമുഖ ബിജെപി നേതാവിന്റെ സഹോദരന്റേതാണെന്ന് റിപ്പോർട്ടുകളുണ്ട്.വോട്ടർമാരെ സ്വാധീനിക്കാൻ ബിജെപി തയ്യാറാക്കിയ കിറ്റുകളാണിതെന്ന് എൽഡിഎഫ് നേതൃത്വം ആരോപിച്ചു. പെരുമാറ്റച്ചട്ടം നിലനിൽക്കെ ഇത്രയധികം കിറ്റുകൾ സ്വകാര്യ സ്ഥാപനത്തിൽ സൂക്ഷിച്ചത് ദുരൂഹമാണെന്നും സംഭവത്തിൽ സമഗ്രമായ അന്വേഷണം വേണമെന്നും എൽഡിഎഫ് ആവശ്യപ്പെട്ടു.
അതേസമയം, രാഷ്ട്രീയ ലക്ഷ്യങ്ങളോടെയല്ല കിറ്റുകൾ സൂക്ഷിച്ചതെന്ന് കമ്പനി അധികൃതർ വിശദീകരിച്ചു. വിഷു പ്രമാണിച്ച് ഒരു ക്ഷേത്രത്തിൽ വിതരണം ചെയ്യാൻ വേണ്ടി ഓർഡർ നൽകി എത്തിച്ച കിറ്റുകളാണിതെന്നാണ് സ്ഥാപന ഉടമകളുടെ വാദം.
ഭക്ഷ്യക്കിറ്റുകൾ പിടിച്ചെടുത്ത സംഭവത്തിൽ തിരഞ്ഞെടുപ്പ് കമ്മീഷൻ റിപ്പോർട്ട് തേടിയിട്ടുണ്ട്. വോട്ടെടുപ്പിന് മുന്നോടിയായി വോട്ടർമാരെ സ്വാധീനിക്കാൻ പണമോ പാരിതോഷികങ്ങളോ നൽകുന്നത് തടയാൻ സംസ്ഥാനത്തുടനീളം പരിശോധന കർശനമാക്കിയിരിക്കുകയാണ്.
Story Summary:
Election flying squad and police seized 750 food kits from a private pickle manufacturing unit in Kacheri, Thrissur. The establishment reportedly belongs to the brother of a BJP leader. While the LDF alleged that the kits were prepared by the BJP to influence voters ahead of the assembly elections, the company authorities claimed the kits were intended for Vishu distribution at a local temple. An investigation into the incident is underway.
