തിരുവനന്തപുരം: നഗരത്തെ നടുക്കി പാപ്പനംകോട് വൻ കഞ്ചാവ് വേട്ട (Trivandrum Drug Bust). ഇന്നോവ കാറിൽ കടത്തുകയായിരുന്ന 300 കിലോഗ്രാമിലധികം കഞ്ചാവുമായി കരകുളം സ്വദേശി അഫ്സലിനെ ഡാൻസാഫ് (DANSAF) സംഘം പിടികൂടി. നർക്കോട്ടിക് അസിസ്റ്റന്റ് കമ്മീഷണർ ഗോപകുമാറിന്റെ നേതൃത്വത്തിലായിരുന്നു ഈ മിന്നൽ പരിശോധന. കരകുളം സ്വദേശി അഫ്സൽ ആണ് പിടിയിലായത്. ഇയാൾ നേരത്തെയും സമാനമായ ലഹരിക്കടത്ത് കേസുകളിൽ പ്രതിയാണെന്ന് പോലീസ് അറിയിച്ചു.
ഇന്നോവ കാറിൽ എത്തിച്ച കഞ്ചാവ് മറ്റൊരാൾക്ക് കൈമാറാൻ പാപ്പനംകോട് കാത്തുനിൽക്കുന്നതിനിടെയാണ് രഹസ്യവിവരത്തെത്തുടർന്ന് പോലീസ് സംഘം പ്രതിയെ വളഞ്ഞത്. തലസ്ഥാനത്ത് അടുത്ത കാലത്ത് നടന്നിട്ടുള്ളതിൽ വെച്ച് ഏറ്റവും വലിയ കഞ്ചാവ് ശേഖരമാണ് ഇപ്പോൾ പിടിച്ചെടുത്തിട്ടുള്ളത്. ലഹരിക്കടത്തിന് ഉപയോഗിച്ച ഇന്നോവ കാറും പോലീസ് കസ്റ്റഡിയിലെടുത്തു.
പ്രതിക്ക് കഞ്ചാവ് എത്തിച്ചുനൽകിയവരെക്കുറിച്ചും ഇത് വാങ്ങാൻ എത്തിയവരെക്കുറിച്ചും പോലീസ് അന്വേഷണം ഊർജിതമാക്കിയിട്ടുണ്ട്. വരും ദിവസങ്ങളിൽ കൂടുതൽ അറസ്റ്റ് ഉണ്ടായേക്കുമെന്നാണ് സൂചന.
