വാഷിംഗ്ടൺ: പശ്ചിമേഷ്യയിൽ യുദ്ധഭീതി നിലനിൽക്കുന്നതിനിടെ ഇറാനിൽ നിന്ന് തനിക്ക് ‘നിഗൂഢമായ’ ഒരു സമ്മാനം ലഭിച്ചതായി വെളിപ്പെടുത്തി അമേരിക്കൻ പ്രസിഡന്റ് ഡൊണാൾഡ് ട്രംപ്. വൈറ്റ് ഹൗസിൽ നടത്തിയ വാർത്താ സമ്മേളനത്തിലാണ് അതീവ സാമ്പത്തിക മൂല്യമുള്ളതും ആശ്ചര്യപ്പെടുത്തുന്നതുമായ ഈ ‘സമ്മാന’ത്തെക്കുറിച്ച് ട്രംപ് സംസാരിച്ചത്.(Trump said Iran has given America a present related to the Strait of Hormuz)
ലഭിച്ച സമ്മാനം ആണവ വിഷയങ്ങളുമായി ബന്ധപ്പെട്ടതല്ലെന്നും മറിച്ച് എണ്ണ, പ്രകൃതിവാതകം എന്നിവയുമായി ബന്ധപ്പെട്ടതാണെന്നും ട്രംപ് വ്യക്തമാക്കി. ഹോർമൂസ് കടലിടുക്കുമായി ബന്ധപ്പെട്ടതാണ് ഈ നീക്കം. അമൂല്യവും വിലപിടിപ്പുള്ളതുമായ ഒരു വലിയ സമ്മാനമായിരുന്നു അത്. എന്താണ് അതെന്ന് ഇപ്പോൾ വെളിപ്പെടുത്തുന്നില്ലെങ്കിലും ശരിയായ ആളുകളുമായാണ് ഇപ്പോൾ ഇടപെടുന്നതെന്ന് ഈ സമ്മാനം തെളിയിക്കുന്നു, ട്രംപ് പറഞ്ഞു.
ഇറാനുമായുള്ള ചർച്ചകൾ പുരോഗമിക്കുന്ന പശ്ചാത്തലത്തിൽ, ഇറാന്റെ ഊർജ്ജ നിലയങ്ങൾക്ക് നേരെ നടത്താനിരുന്ന സൈനിക ആക്രമണങ്ങൾ അഞ്ച് ദിവസത്തേക്ക് നീട്ടിവെച്ചതായും ട്രംപ് അറിയിച്ചു. ട്രൂത്ത് സോഷ്യൽ പ്ലാറ്റ്ഫോമിലൂടെയാണ് അദ്ദേഹം ഇക്കാര്യം വ്യക്തമാക്കിയത്.
