വാഷിങ്ടൺ: ഇറാനിൽ തകർന്നു വീണ അമേരിക്കൻ യുദ്ധവിമാനത്തിലെ രണ്ടാമത്തെ പൈലറ്റിനെയും അതിസാഹസികമായ തിരച്ചിൽ-രക്ഷാ ദൗത്യത്തിലൂടെ സുരക്ഷിതമായി പുറത്തെത്തിച്ചുവെന്ന് വിവരം. ശത്രുരാജ്യത്തിന്റെ മണ്ണിൽ അമേരിക്കൻ സൈന്യം നടത്തുന്ന ഏറ്റവും സങ്കീർണ്ണമായ ദൗത്യങ്ങളിലൊന്നാണിതെന്ന് മുതിർന്ന ഉദ്യോഗസ്ഥരെ ഉദ്ധരിച്ച് റിപ്പോർട്ട് ചെയ്തു.(Safe and sound, Trump says second US pilot missing in Iran rescued)
തകർക്കപ്പെട്ട എഫ്-15ഇ യുദ്ധവിമാനത്തിലെ രണ്ടാമത്തെ ഉദ്യോഗസ്ഥനും സുരക്ഷിതനാണെന്ന് യുഎസ് പ്രസിഡന്റ് ഡൊണാൾഡ് ട്രംപ് ‘ട്രൂത്ത് സോഷ്യലിലൂടെ’ സ്ഥിരീകരിച്ചു. “എന്റെ പ്രിയ അമേരിക്കക്കാരെ, കഴിഞ്ഞ ഏതാനും മണിക്കൂറുകൾക്കുള്ളിൽ അമേരിക്കൻ സൈന്യം ചരിത്രത്തിലെ ഏറ്റവും ധീരമായ രക്ഷാപ്രവർത്തനങ്ങളിലൊന്ന് നടത്തിയിരിക്കുന്നു. നമ്മുടെ സൈന്യത്തിലെ ഉന്നതനായ ഒരു കേണലിനെയാണ് നാം സുരക്ഷിതനായി തിരികെ എത്തിച്ചിരിക്കുന്നത്,” ട്രംപ് കുറിച്ചു.
അഞ്ച് ആഴ്ച മുമ്പ് ആരംഭിച്ച സംഘർഷത്തിനിടെ വെള്ളിയാഴ്ചയാണ് അമേരിക്കയുടെ എഫ്-15ഇ സ്ട്രൈക്ക് ഈഗിൾ വിമാനം തകർക്കപ്പെട്ടതായി ഇറാൻ അവകാശപ്പെട്ടത്.വിമാനത്തിലുണ്ടായിരുന്ന രണ്ട് പൈലറ്റുമാർക്കായി അമേരിക്കയും ഇറാനും ഒരേസമയം തിരച്ചിൽ ആരംഭിച്ചിരുന്നു. പൈലറ്റുമാരെ സുരക്ഷിതമാക്കാൻ അമേരിക്ക ശ്രമിച്ചപ്പോൾ, അവരെ പിടികൂടി വിലപേശലിന് ഉപയോഗിക്കാനായിരുന്നു ഇറാന്റെ നീക്കം. ആദ്യ പൈലറ്റിനെ നേരത്തെ തന്നെ രക്ഷപ്പെടുത്തിയിരുന്നു. എന്നാൽ രണ്ടാമത്തെ പൈലറ്റ് രണ്ട് ദിവസത്തോളം ഇറാനിയൻ സൈന്യത്തിന്റെ കണ്ണുവെട്ടിച്ച് ഒളിവിൽ കഴിയുകയായിരുന്നു. പൈലറ്റ് എവിടെയാണെന്ന് ഇറാൻ അധികൃതർ ഏകദേശം മനസ്സിലാക്കിയിരുന്നതിനാൽ അതീവ വേഗത്തിലാണ് അമേരിക്കൻ സൈന്യം നീങ്ങിയത്. രക്ഷാദൗത്യത്തിനിടെ അമേരിക്കൻ സൈന്യവും ഇറാനിയൻ സേനയും തമ്മിൽ ശക്തമായ വെടിവെപ്പുണ്ടായതായി റിപ്പോർട്ടുകളുണ്ട്.
