അബുദാബി/കുവൈറ്റ് സിറ്റി: പശ്ചിമേഷ്യൻ യുദ്ധം ഗൾഫ് രാജ്യങ്ങളിലേക്കും വ്യാപിക്കുന്നു (Iran Attack UAE Kuwait Deaths). ഇറാൻ തൊടുത്തുവിട്ട മിസൈലുകളും ഡ്രോണുകളും പതിച്ച് യുഎഇയിൽ മൂന്ന് പേരും കുവൈറ്റിൽ ഒരാളും കൊല്ലപ്പെട്ടു. യുഎഇയിൽ മരിച്ചവർ പാകിസ്ഥാൻ, നേപ്പാൾ, ബംഗ്ലാദേശ് സ്വദേശികളാണെന്ന് പ്രതിരോധ മന്ത്രാലയം സ്ഥിരീകരിച്ചു.
നാശനഷ്ടങ്ങളുടെ കണക്കുകൾ
യുഎഇ: ആക്രമണങ്ങളിൽ 58 പേർക്ക് പരിക്കേറ്റു. ദുബായ് അന്താരാഷ്ട്ര വിമാനത്താവളത്തിലെ നാല് ജീവനക്കാർക്കും സായിദ് വിമാനത്താവളത്തിന് സമീപവുമുള്ളവർക്കും പരിക്കേറ്റിട്ടുണ്ട്.
കുവൈറ്റ്: ഒരാൾ കൊല്ലപ്പെടുകയും 32 പേർക്ക് പരിക്കേൽക്കുകയും ചെയ്തു. കുവൈറ്റ് ആഭ്യന്തര മന്ത്രി ശൈഖ് ഫഹദ് അൽ യുസഫ് പരിക്കേറ്റവരെ സന്ദർശിച്ചു.
ഇസ്രായേൽ: ബീറ്റ് ഷെമേഷ് നഗരത്തിലുണ്ടായ ബാലിസ്റ്റിക് മിസൈൽ ആക്രമണത്തിൽ എട്ടുപേർ കൊല്ലപ്പെട്ടു. 27 പേർക്ക് പരിക്കേറ്റു.
പ്രതിരോധവും മുൻകരുതലും:
യുഎഇ വ്യോമസേന ഇറാന്റെ 137 ബാലിസ്റ്റിക് മിസൈലുകളിൽ 132 എണ്ണവും 209 ഡ്രോണുകളിൽ 195 എണ്ണവും വിജയകരമായി തകർത്തു. എന്നിരുന്നാലും 21 ഡ്രോണുകൾ ജനവാസ മേഖലകളിൽ പതിച്ചു.
അതേസമയം , യുദ്ധ സാഹചര്യം കണക്കിലെടുത്ത് യുഎഇയിലെ വിദ്യാലയങ്ങളും സർവ്വകലാശാലകളും മാർച്ച് 4 വരെ ഓൺലൈൻ ക്ലാസുകളിലേക്ക് മാറി. ദുബായ്, അൽ മക്തൂം വിമാനത്താവളങ്ങളിൽ നിന്നുള്ള വിമാന സർവീസുകൾ താൽക്കാലികമായി നിർത്തിവെച്ചു.
സുരക്ഷ: അനാവശ്യമായി പുറത്തിറങ്ങരുതെന്ന് അധികൃതർ കർശന നിർദ്ദേശം നൽകി.
ഗൾഫ് മേഖലയിൽ യുദ്ധം രൂക്ഷമാകുന്നതോടെ ലക്ഷക്കണക്കിന് മലയാളി പ്രവാസികൾ കടുത്ത ആശങ്കയിലാണ്. പലരും നാട്ടിലേക്ക് മടങ്ങാൻ ശ്രമിക്കുന്നുണ്ടെങ്കിലും വിമാന സർവീസുകൾ മുടങ്ങിയത് തിരിച്ചടിയാകുന്നു.
Story Summary: Four expatriates were killed in the UAE and Kuwait following missile and drone attacks by Iran. UAE’s defense ministry confirmed the deaths of Pakistani, Nepali, and Bangladeshi nationals. While most missiles were intercepted, shrapnel caused injuries to 58 in the UAE and 32 in Kuwait. Schools in the UAE have moved to online mode until March 4, and major airports have suspended operations.
