മുംബൈ: ഇറാൻ-ഇസ്രായേൽ സംഘർഷം യുദ്ധത്തിലേക്ക് വഴിമാറിയതോടെ ഇന്ത്യൻ ഓഹരി വിപണിയിൽ വൻ തകർച്ച. ഇന്ന് വ്യാപാരത്തിന്റെ ഒരു ഘട്ടത്തിൽ ബി.എസ്.ഇ സെൻസെക്സ് 1,800 പോയിന്റിലധികം ഇടിഞ്ഞ് 79,500 നിലവാരത്തിന് താഴെയെത്തി. എൻ.എസ്.ഇ (NSE) നിഫ്റ്റി 24,650-നും താഴെ പോയി. വിപണിയിലെ ഈ രക്തച്ചൊരിച്ചിലിൽ നിക്ഷേപകരുടെ ഏകദേശം 11 ലക്ഷം കോടി രൂപയാണ് ഒറ്റദിവസം കൊണ്ട് ഇല്ലാതായത്.(Iran-Israel conflict, Stock market plunges sharply)
ഇറാന് നേരെയുള്ള ആക്രമണവും ഹോർമുസ് കടലിടുക്കിലെ സ്തംഭനവും ആഗോള വിപണിയിൽ ക്രൂഡ് ഓയിൽ വില കുത്തനെ ഉയർത്തി. ബ്രെന്റ് ക്രൂഡ് വില ബാരലിന് 10% വരെ വർദ്ധിച്ചത് ഇന്ത്യയെപ്പോലെ എണ്ണ ഇറക്കുമതി ചെയ്യുന്ന രാജ്യത്തിന് വലിയ തിരിച്ചടിയായി.
യുദ്ധഭീതിയെത്തുടർന്ന് രൂപയുടെ മൂല്യം റെക്കോർഡ് താഴ്ചയിലേക്ക് (ഡോളറിന് 91 രൂപയ്ക്ക് മുകളിൽ) പതിച്ചു. ഏഷ്യൻ വിപണികളിലും യൂറോപ്യൻ വിപണികളിലും ദൃശ്യമായ ഇടിവ് ഇന്ത്യൻ വിപണിയെയും ബാധിച്ചു.
വിമാന സർവീസുകൾ റദ്ദാക്കിയതിനെത്തുടർന്ന് ഇൻഡിഗോ പോലുള്ള ഏവിയേഷൻ ഓഹരികൾക്കും, ഇന്ധനവില കൂടിയതിനാൽ ഓട്ടോമൊബൈൽ, പെയിന്റ് മേഖലകളിലെ ഓഹരികൾക്കും കനത്ത ഇടിവുണ്ടായി. എന്നാൽ യുദ്ധസാഹചര്യത്തിൽ പ്രതിരോധ മേഖലയിലെ ഓഹരികളും, ക്രൂഡ് ഓയിൽ വില കൂടിയതിനാൽ എണ്ണ പര്യവേക്ഷണ കമ്പനികളും നേട്ടമുണ്ടാക്കി.
