ടെഹ്റാൻ: ടെഹ്റാനിൽ നടന്ന യുഎസ്-ഇസ്രായേൽ വ്യോമാക്രമണത്തിൽ കൊല്ലപ്പെട്ടുവെന്ന് കരുതിയിരുന്ന ആയത്തുള്ള അലി ഖമേനിയുടെ ഭാര്യ ജീവിച്ചിരിപ്പുണ്ടെന്ന് ഇറാൻ ഔദ്യോഗികമായി സ്ഥിരീകരിച്ചു. ഖമേനിക്കൊപ്പം അദ്ദേഹത്തിന്റെ ഭാര്യയും കൊല്ലപ്പെട്ടുവെന്നായിരുന്നു നേരത്തെ പുറത്തുവന്ന വാർത്തകൾ. എന്നാൽ ഈ റിപ്പോർട്ടുകൾ തെറ്റാണെന്നും അവർ സുരക്ഷിതയാണെന്നും സ്റ്റേറ്റ് മീഡിയ പ്രസ്താവനയിലൂടെ വ്യക്തമാക്കി.(Ayatollah Ali Khamenei’s wife is alive, confirms Iranian media)
ഇറാന്റെ പുതിയ പരമോന്നത നേതാവായി ചുമതലയേറ്റ മൊജ്തബ ഖമേനി നടത്തിയ ആദ്യ ഔദ്യോഗിക പ്രസ്താവനയ്ക്ക് പിന്നാലെയാണ് ഭാര്യയുടെ കാര്യത്തിൽ വ്യക്തത വന്നത്. ആക്രമണത്തിൽ തന്റെ പിതാവ് കൊല്ലപ്പെട്ടതായും മൃതദേഹം നേരിട്ട് കണ്ടതായും മൊജ്തബ സ്ഥിരീകരിച്ചു. തന്റെ സഹോദരിമാരിൽ ഒരാൾ, അനന്തരവൾ, സഹോദരി ഭർത്താവ് എന്നിവരുൾപ്പെടെയുള്ള കുടുംബാംഗങ്ങൾ കൊല്ലപ്പെട്ടതായും അദ്ദേഹം വ്യക്തമാക്കി.
വർഷങ്ങൾ നീണ്ട നിരീക്ഷണങ്ങൾക്കൊടുവിലാണ് ഇസ്രായേൽ-യുഎസ് സഖ്യം അലി ഖമേനിയെ ലക്ഷ്യമിട്ട് ആക്രമണം നടത്തിയത്. ഇറാന്റെ രാഷ്ട്രീയ-സുരക്ഷാ മേഖലയിലെ നിരവധി പ്രമുഖരും ഈ ആക്രമണത്തിൽ കൊല്ലപ്പെട്ടിരുന്നു. പരമോന്നത നേതാവിന്റെ വധവും അതിനുപിന്നാലെ പുതിയ നേതാവ് മൊജ്തബ ഖമേനിയുടെ ആരോഗ്യനിലയെക്കുറിച്ചുള്ള ദുരൂഹതകളും നിലനിൽക്കെ പുറത്തുവന്ന ഈ റിപ്പോർട്ട് ഏറെ പ്രാധാന്യമർഹിക്കുന്നു.
