പശ്ചിമേഷ്യയിൽ യുദ്ധം അതിരൂക്ഷമായതോടെ ആഗോള വിപണിയിൽ ക്രൂഡ് ഓയിൽ വില കുതിച്ചുയരുന്നു (Mideast War Oil Price Surge). ഒമാൻ തീരത്തിന് സമീപം രണ്ട് എണ്ണക്കപ്പലുകൾക്ക് (Tankers) നേരെ മിസൈൽ ആക്രമണമുണ്ടായതാണ് വിപണിയെ പ്രകോപിപ്പിച്ചത്. ഇതോടെ എണ്ണവില 10 ശതമാനം വർദ്ധിച്ച് ബാരലിന് 80 ഡോളറിലെത്തി. ഇത് ഉടൻ തന്നെ 100 ഡോളർ കടന്നേക്കുമെന്ന് വിദഗ്ധർ മുന്നറിയിപ്പ് നൽകുന്നു.
ഹോർമുസ് കടലിടുക്കിന് (Strait of Hormuz) സമീപം ‘സ്കൈലൈറ്റ്’ (Skylight) എന്ന ചെറിയ ടാങ്കറിന് നേരെ ഇറാന്റെ മിസൈൽ പതിച്ചു. കപ്പൽ അഗ്നിക്കിരയായതായാണ് റിപ്പോർട്ട്. ലോകത്തിലെ എണ്ണ വിതരണത്തിന്റെ അഞ്ചിലൊന്നും കടന്നുപോകുന്ന ഈ പാത അപകടത്തിലായത് വിപണിയെ ഞെട്ടിച്ചു.
ഈ മാസമാദ്യം ബാരലിന് 65 ഡോളറിൽ താഴെയായിരുന്ന എണ്ണവിലയാണ് ഇപ്പോൾ 80 ഡോളറിലെത്തിയത്. ഗോൾഡ്മാൻ സാക്സ് (Goldman Sachs) പോലുള്ള സ്ഥാപനങ്ങൾ വില 110 ഡോളർ വരെ ഉയർന്നേക്കാമെന്ന് പ്രവചിക്കുന്നു. എണ്ണവിലയിൽ ഓരോ ഡോളറിന്റെ വർദ്ധനവും ഇന്ത്യയുടെ ഇറക്കുമതി ചെലവിൽ 1.3 മുതൽ 1.4 ബില്യൺ ഡോളർ വരെ അധിക ബാധ്യതയുണ്ടാക്കും. ഇത് രൂപയുടെ മൂല്യം ഇടിയുന്നതിനും പണപ്പെരുപ്പത്തിനും കാരണമാകും.
അതേസമയം , നിന്നുള്ള വിതരണം തടസ്സപ്പെട്ടാൽ റഷ്യയിൽ നിന്നുള്ള എണ്ണ ഇറക്കുമതി വർദ്ധിപ്പിക്കാൻ ഇന്ത്യ ആലോചിക്കുന്നു. നിലവിൽ അറബിക്കടലിലും ഇന്ത്യൻ മഹാസമുദ്രത്തിലും റഷ്യൻ എണ്ണയുമായി പോകുന്ന കപ്പലുകൾ ലഭ്യമാണ്. ഇന്ത്യയിലെ എണ്ണശുദ്ധീകരണ ശാലകളിൽ 10 മുതൽ 15 ദിവസത്തേക്കുള്ള ക്രൂഡ് ഓയിൽ ശേഖരം നിലവിലുണ്ട്. കൂടാതെ 7-10 ദിവസത്തെ ഇന്ധന ആവശ്യങ്ങൾ നിറവേറ്റാനുള്ള പെട്രോളും ഡീസലും സംഭരണികളിലുണ്ട്.
ക്രൂഡ് ഓയിലിനേക്കാൾ ഇന്ത്യയെ ആശങ്കപ്പെടുത്തുന്നത് എൽപിജി വിതരണമാണ്. ഇന്ത്യയുടെ എൽപിജി ഇറക്കുമതിയുടെ 80-85 ശതമാനവും ഗൾഫ് രാജ്യങ്ങളിൽ നിന്നാണ്. ഇതിന് ആവശ്യമായ ‘സ്ട്രാറ്റജിക് റിസർവ്’ (Strategic Reserve) ഇന്ത്യക്കില്ലാത്തത് വലിയ വെല്ലുവിളിയാണ്.
