ഒരു ദിവസത്തേക്ക് ആവശ്യമായ ഊര്ജം പ്രദാനം ചെയ്യുന്നത് പ്രഭാതഭക്ഷണമാണ് (Importance of Morning Meal). പ്രഭാത ഭക്ഷണം ചയാപചയം മെച്ചപ്പെടുത്തുന്നതിലും രക്തത്തിലെ പഞ്ചസാര ബാലന്സ് ചെയ്യുന്നതിലും ഹൃദയാരോഗ്യത്തിലും ധാരണശേഷിയിലുമെല്ലാം മുഖ്യ പങ്ക് വഹിക്കുന്നു. ക്ഷീണം, സമ്മര്ദം, അമിതവണ്ണം, പ്രമേഹം എന്നിങ്ങനെ പ്രഭാതഭക്ഷണം കഴിക്കാതിരിക്കുന്നവരെ കാത്തിരിക്കുന്ന ആരോഗ്യ പ്രശ്നങ്ങള് പലതാണ്. പ്രഭാതഭക്ഷണത്തിന്റെ അഭാവം വിശപ്പുണ്ടാക്കുന്ന ഹോര്മോണുകള്ക്ക് ആശയക്കുഴപ്പം സൃഷ്ടിക്കുന്നതിനാൽ ആ ദിവസത്തിന്റെ ബാക്കിയുള്ള സമയങ്ങളില് അമിതമായി കഴിക്കാന് ഇടയാക്കും.
പ്രഭാതഭക്ഷണം ഒഴിവാക്കാതെ കഴിക്കണമെന്നത് പ്രധാനമാണ്. എന്നാല് എപ്പോള് കഴിക്കണം എന്ന കാര്യത്തില് പലര്ക്കും അത്ര ധാരണയില്ല. ഓഫീസിലേക്കും സ്കൂളിലേക്കുമൊക്കെ ഇറങ്ങുന്നതിന് മുന്പ് ഒരു എട്ടിനും ഒന്പതിനും ഇടയിലാണ് നമ്മുടെ നാട്ടില് ഭൂരിപക്ഷം പേരും പ്രഭാതഭക്ഷണം കഴിക്കുന്നത്. പ്രഭാത ഭക്ഷണം കഴിക്കാന് ഏറ്റവും മികച്ച സമയം രാവിലെ 11 മണിയാണെന്നാണ് വിദഗ്ദ്ധരുടെ അഭിപ്രായം. രാവിലെ ഉണര്ന്ന് കുറച്ച് മണിക്കൂറുകള് കാത്തിരുന്ന ശേഷം ഭക്ഷണം കഴിക്കുന്നതാണ് ആരോഗ്യത്തോടെ ഇരിക്കാനും അമിതഭാരം കുറയ്ക്കാനും നല്ലതെന്നാണ് പറയുന്നത്. അതുപോലെ, ഭക്ഷണം ചവച്ചരച്ച് വളരെ പതിയെ കഴിക്കണം. മറ്റ് ജോലികള്ക്കിടയില് അതിവേഗത്തിൽ ചടങ്ങ് പോലെ കഴിച്ച് തീര്ക്കരുത്.
പ്രഭാത ഭക്ഷണത്തിനുള്ള സമയം 11 മണിയായി നിശ്ചയിക്കുന്നത്, അത്താഴം കഴിച്ച് കഴിഞ്ഞ് 14 മണിക്കൂറെങ്കിലും വിശന്നിരിക്കുന്നത് ചയാപചയം മെച്ചപ്പെടാന് സഹായിക്കുമെന്നാണ് പറയുന്നത്. അതായത് രാത്രി ഏഴിന് അത്താഴം കഴിക്കുന്നവര്ക്ക് പ്രഭാതഭക്ഷണം രാവിലെ ഒന്പതിനാകാം. എന്നാല് നിലവിലെ ജീവിതശൈലി വൈകി അത്താഴം കഴിക്കുക എന്ന ശീലത്തിലേക്ക് പലരെയും എത്തിച്ചിരിക്കുന്നു.
