കൊച്ചി: പുതുവത്സരത്തിൽ യാത്രക്കാർക്ക് സൗജന്യ വൈഫൈ സൗകര്യം ലഭ്യമാകാനൊരുങ്ങി എയർ ഇന്ത്യ(Free Wi-Fi In Air India ). ടാറ്റാ ഗ്രൂപ്പിന്റെ ഉടമസ്ഥതയിലുള്ള എയർ ഇന്ത്യ തങ്ങളുടെ തിരഞ്ഞെടുക്കപ്പെട്ട എയർബസ് എ350, ബോയിങ് 787-9, തിരഞ്ഞെടുത്ത എയർബസ് എ 321നിയോ എയർക്രാഫ്റ്റ് എന്നിവയിലാണ് വിമാനത്തിനകത്തെ സൗജന്യ വൈഫൈ സൗകര്യം നൽകുന്നത്. ഇങ്ങനെ ഇന്ത്യയിൽ സൗജന്യ വൈഫൈ സൗകര്യം ലഭ്യമാകുന്ന ആദ്യ വിമാന കമ്പനിയായി മാറിയിരിക്കുകയാണ് എയർ ഇന്ത്യ. സൗജന്യമായി ലഭിക്കുന്ന ഈ വൈഫൈ സേവനം, വിമാന യാത്ര ഉല്ലാസപ്രദമാക്കുന്നതിനൊപ്പം ബിസിനസ് പ്രവർത്തനങ്ങളെ പിന്തുണയ്ക്കുമെന്ന് ചീഫ് കസ്റ്റമർ എക്‌സ്പീരിയൻസ് ഓഫീസർ രാജേഷ് ഡോഗ്ര അഭിപ്രായപ്പെട്ടു.
സാറ്റലൈറ്റ് കണക്ടിവിറ്റി, ബാൻഡ്‌ വിഡ്ത്ത് ഉപയോഗം, ഫ്‌ളൈറ്റ് റൂട്ടുകൾ, സർക്കാർ നിയന്ത്രണങ്ങൾ തുടങ്ങിയ വിവിധ സാങ്കേതിക ഘടകങ്ങളെ ആശ്രയിച്ചിരിക്കും കണക്ടിവിറ്റി ലഭ്യമാകുക. പതിനായിരം അടിക്ക് മേൽ പ്രവർത്തിക്കുന്ന ഈ സേവനം ഐഒഎസ്, ആൻഡ്രോയിഡ് പ്ലാറ്റ്ഫോമുകളിൽ പ്രവർത്തിക്കുന്ന നിരവധി ഉപകരണങ്ങളിൽ ഒരേ സമയം ലഭ്യമാകും. ഘട്ടംഘട്ടമായി മുഴുവൻ വിമാനങ്ങളിലേക്കും ഈ സേവനം വ്യാപിപ്പിക്കാനാണ് എയർ ഇന്ത്യ ലക്ഷ്യമിടുന്നത്.