ആരാധകർ തിരയുന്ന ആ ‘ക്ലൈമാക്സ്’; ആരാധികയിൽ നിന്ന് തുടങ്ങിയ പ്രണയം; വിജയ്-സംഗീത വിവാഹമോചനം ചർച്ചയാകുമ്പോൾ | Vijay Sangeetha Love Story

ചെന്നൈ: ആക്ഷനും റൊമാൻസും നിറഞ്ഞ തമിഴ് സിനിമകളെപ്പോലെ മനോഹരമായിരുന്നു വിജയ്‌യുടെയും സംഗീതയുടെയും പ്രണയയാത്ര. എന്നാൽ ആ യാത്ര ഇപ്പോൾ ചെങ്കൽപേട്ട് കുടുംബകോടതിയിലെ വിവാഹമോചന ഹർജിയിൽ എത്തിനിൽക്കുമ്പോൾ തെന്നിന്ത്യൻ സിനിമാലോകം ഒന്നടങ്കം ഞെട്ടലിലാണ് (Vijay Sangeetha Love Story). ഒരു തികഞ്ഞ ആരാധിക എന്ന നിലയിൽ വിജയ്‌യുടെ ജീവിതത്തിലേക്ക് വന്ന സംഗീത എങ്ങനെയാണ് പ്രിയതമയായി മാറിയതെന്ന കഥയാണ് ഇപ്പോൾ വീണ്ടും ശ്രദ്ധ നേടുന്നത്.

1996-ൽ വിജയ്‌യുടെ കരിയർ മാറ്റിമറിച്ച ‘പൂവേ ഉനക്കാഗ’ എന്ന ചിത്രമാണ് ഇവരെ ഒന്നിപ്പിച്ചത്. ചിത്രത്തിലെ പ്രകടനത്തിന് വിജയ്‌യെ നേരിൽ കണ്ട് അഭിനന്ദിക്കാനായി ലണ്ടനിൽ നിന്ന് ചെന്നൈയിലെത്തിയതായിരുന്നു സംഗീത സ്വർണലിംഗം. ചെന്നൈ ഫിലിം സിറ്റിയിലെ ഷൂട്ടിങ്ങിനിടെയാണ് സംഗീത വിജയ്‌യെ കാണുന്നത്. ആദ്യ കൂടിക്കാഴ്ചയിൽ തന്നെ വിജയ് സംഗീതയെ തന്റെ വീട്ടിലേക്ക് ക്ഷണിച്ചു. മാതാപിതാക്കളായ എസ്.എ. ചന്ദ്രശേഖറെയും ശോഭയെയും സംഗീത പരിചയപ്പെട്ടു.

സംഗീതയുടെ സ്വഭാവത്തിലും പെരുമാറ്റത്തിലും ആകൃഷ്ടരായ എസ്.എ. ചന്ദ്രശേഖർ മരുമകളാകാൻ സമ്മതമാണോ എന്ന് നേരിട്ട് ചോദിക്കുകയായിരുന്നു. സംഗീതയും വിജയ്‌യും സമ്മതം മൂളിയതോടെ ലണ്ടനിലുള്ള സംഗീതയുടെ വീട്ടിലെത്തി വിവാഹം ഉറപ്പിച്ചു.

1999 ഓഗസ്റ്റ് 25-നായിരുന്നു ഇവരുടെ വിവാഹം. വിജയ് ക്രിസ്തുമത വിശ്വാസിയും സംഗീത ഹിന്ദുമത വിശ്വാസിയുമായിരുന്നിട്ടും കുടുംബങ്ങൾക്കിടയിൽ അത് പ്രശ്നമായില്ല. 1954-ലെ സ്പെഷ്യൽ മാര്യേജ് ആക്ട് പ്രകാരമാണ് വിവാഹം രജിസ്റ്റർ ചെയ്തത്. മക്കളായ ജേസൺ സഞ്ജയ്ക്കും ദിവ്യ സാഷയ്ക്കുമൊപ്പം സന്തോഷകരമായ കുടുംബജീവിതമായിരുന്നു ഇത്രയും കാലം ഇവർ നയിച്ചിരുന്നത്.

വർഷങ്ങൾക്കിപ്പുറം വിവാഹേതര ബന്ധമടക്കമുള്ള ഗുരുതര ആരോപണങ്ങൾ ഉയർത്തി സംഗീത കോടതിയെ സമീപിക്കുമ്പോൾ, സോഷ്യൽ മീഡിയയിൽ ഈ പഴയ പ്രണയകഥകൾ വേദനയോടെയാണ് സിനിമാ പ്രേമികൾ പങ്കുവെക്കുന്നത്.

തമിഴക വെട്രി കഴകം (TVK) നേതാവും നടനുമായ വിജയ്‌യും ഭാര്യ സംഗീതയും വിവാഹമോചനത്തിനൊരുങ്ങുന്നു (Actor Vijay Divorce News). 25 വർഷം നീണ്ട ദാമ്പത്യത്തിന് ഒടുവിൽ സംഗീത ചെങ്കൽപേട്ട് കുടുംബകോടതിയിൽ ഹർജി ഫയൽ ചെയ്തതായി ന്യൂസ് 18 റിപ്പോർട്ട് ചെയ്തു. ഹർജി ഫയലിൽ സ്വീകരിച്ച കോടതി വിജയ്ക്ക് നോട്ടീസ് അയച്ചു.

വിജയ്ക്ക് ഒരു നടിയുമായി വിവാഹേതര ബന്ധമുണ്ടായിരുന്നുവെന്നാണ് സംഗീത ഹർജിയിൽ ആരോപിക്കുന്നത്. 2021-ൽ ഈ ബന്ധം താൻ കണ്ടെത്തിയെന്നും ഇത് അവസാനിപ്പിക്കാമെന്ന് വിജയ് ഉറപ്പുനൽകിയിരുന്നതായും ഹർജിയിൽ പറയുന്നു.ബന്ധം അവസാനിപ്പിക്കാമെന്ന് പറഞ്ഞെങ്കിലും വിജയ് അത് യാതൊരു പശ്ചാത്താപവുമില്ലാതെ തുടർന്നതാണ് തന്നെ കോടതിയെ സമീപിക്കാൻ പ്രേരിപ്പിച്ചതെന്ന് സംഗീത വ്യക്തമാക്കുന്നു.

1954-ലെ സ്പെഷ്യൽ മാര്യേജ് ആക്ട് സെക്ഷൻ 27(1)(എ), 27(1)(ഡി) പ്രകാരമാണ് വിവാഹമോചനം തേടിയിരിക്കുന്നത്. ക്രൂരത, വിവാഹേതര ബന്ധം എന്നീ കാരണങ്ങൾ മുൻനിർത്തിയാണ് ഈ ഹർജി.

കേസിൽ വാദം കേൾക്കുന്നതിനായി ഏപ്രിൽ 20-ന് കോടതിയിൽ നേരിട്ട് ഹാജരാകാൻ വിജയ്‌യോട് കോടതി നിർദ്ദേശിച്ചു. 1999 ഓഗസ്റ്റ് 25-നായിരുന്നു ലണ്ടൻ മലയാളിയായ സംഗീതയുമായുള്ള വിജയ്‌യുടെ വിവാഹം. ഇവർക്ക് ജേസൺ സഞ്ജയ്, ദിവ്യ സാഷ എന്നിങ്ങനെ രണ്ട് മക്കളുണ്ട്.

കഴിഞ്ഞ കുറച്ചു കാലങ്ങളായി കുടുംബ ചടങ്ങുകളിൽ നിന്നും വിജയ്‌യുടെ രാഷ്ട്രീയ പരിപാടികളിൽ നിന്നും സംഗീത വിട്ടുനിൽക്കുന്നത് വലിയ ചർച്ചയായിരുന്നു. എന്നാൽ പ്രചരിക്കുന്ന വാർത്തകളെക്കുറിച്ച് വിജയ്‌യോ സംഗീതയോ ഇതുവരെ ഔദ്യോഗികമായി പ്രതികരിച്ചിട്ടില്ല.

Story Summary: As reports of Vijay and Sangeetha’s divorce surface, their legendary love story is trending. From being a fan from London who met Vijay after his hit ‘Poove Unakkaga’ to becoming his wife in 1999, Sangeetha’s journey was cinematic. The couple married under the Special Marriage Act. Now, the news of their legal separation after 25 years has shocked the industry.