കുഞ്ചാക്കോ ബോബൻ നായകനായി എത്തുന്ന ഏറ്റവും പുതിയ സിനിമയുടെ ടൈറ്റിൽ പോസ്റ്റർ പുറത്തുവിട്ടു. "ബേബി ഗേൾ" എന്നാണ് ചിത്രത്തിന് പേര് നൽകിയിരിക്കുന്നത്. സിനിമാ നിർമ്മാണ-വിതരണ രംഗത്ത് പുതിയ അധ്യായങ്ങൾ കുറിക്കുകയും തന്റേതായ സാന്നിധ്യം മുന്നിട്ടു നിർത്തുകയും ചെയ്യുന്ന നിർമ്മാതാവ് ലിസ്റ്റിൻ സ്റ്റീഫൻ, തന്റെ ആദ്യത്തെ സിനിമയായ ട്രാഫിക്കിന്റെ ടീമുമായി വീണ്ടും ഒന്നിക്കുന്ന ചിത്രം കൂടിയാണിത്. 14 വർഷങ്ങൾക്കപ്പുറമാണ് ഈ ടീമിന്റെ ഒന്നുചേരൽ.
ത്രില്ലർ മൂഡിലുള്ള ബേബി ഗേൾ എന്ന ചിത്രത്തിന്റെ രചന നിർവഹിക്കുന്നത് ബോബി -സഞ്ജയ് ആണ്. രാജേഷ് പിള്ളയുടെ സംവിധാനത്തിൽ ലിസ്റ്റിൻ സ്റ്റീഫൻ ആദ്യമായി നിർമ്മിച്ച റോഡ് ത്രില്ലർ ചിത്രം ട്രാഫിക്കിന്റെ രചനയും ബോബി സഞ്ജയ് ആയിരുന്നു. ഇക്കുറി ഈ ടീമിലേക്ക് ഒരു ഹിറ്റ് സംവിധായകൻ കൂടി ചേരുകയാണ്. സുരേഷ് ഗോപി- ബിജു മേനോൻ കോമ്പോയിലെത്തിയ ഗരുഡന്റെ സംവിധായകൻ അരുൺ വർമ്മയാണത്. അദ്ദേഹമാണ് ബേബി ഗേളിന്റെ സംവിധാനം.