കൊച്ചി: നടി ആക്രമിക്കപ്പെട്ട കേസിൻ്റെ വിധിന്യായത്തിലെ നിർണായക വിവരങ്ങൾ പുറത്ത്. കേസിലെ ഒന്നാം പ്രതിയായ പൾസർ സുനി ക്വട്ടേഷൻ നൽകിയത് ഒരു സ്ത്രീയാണെന്ന് മൊഴി നൽകിയിട്ടും, പോലീസിൻ്റെ അന്വേഷണത്തിൽ ഈ 'മാഡം' ആരാണെന്ന് കണ്ടെത്താൻ ശ്രമിച്ചില്ലെന്ന് കോടതി രൂക്ഷമായി വിമർശിച്ചു. അന്വേഷണ സംഘത്തിന് ഗുരുതരമായ വീഴ്ച സംഭവിച്ചുവെന്നാണ് വിധിന്യായത്തിൽ പ്രധാനമായും ചൂണ്ടിക്കാണിക്കുന്നത്.(The verdict drew sharp criticism for the police not investigating the woman behind the quotation in the actress assault case)
ആക്രമിക്കപ്പെട്ട നടിയോട് ക്വട്ടേഷൻ നൽകിയത് ഒരു സ്ത്രീയാണെന്ന് പൾസർ സുനി പറഞ്ഞിരുന്നു. എന്നാൽ, ആദ്യഘട്ട കുറ്റപത്രത്തിലടക്കം ഈ നിർണായക വിവരം അന്വേഷണസംഘം വേണ്ടത്ര പരിശോധിച്ചില്ലെന്ന് കോടതി വ്യക്തമാക്കുന്നു. കൃത്യം നടക്കുന്നതിന് തൊട്ടുമുമ്പ് പൾസർ സുനി ഒരു സ്ത്രീയുമായി സംസാരിച്ചിരുന്നു. എന്നാൽ, ഈ വ്യക്തിയെക്കുറിച്ച് പോലീസ് കാര്യമായി അന്വേഷിച്ചില്ല. അവരെ കേസിൽ സാക്ഷിയാക്കുക പോലും ചെയ്തിട്ടില്ലെന്ന് കോടതി ഉത്തരവിൽ പറയുന്നു.
ഈ സ്ത്രീയുമായി സുനിക്ക് ഏറെ അടുപ്പമുണ്ടായിരുന്ന വ്യക്തിയാണെന്ന് പറഞ്ഞ് പ്രോസിക്യൂഷൻ ഒഴിഞ്ഞുമാറുകയായിരുന്നു എന്നും കോടതി നിരീക്ഷിച്ചു. ഈ സ്ത്രീക്ക് കൃത്യത്തെക്കുറിച്ച് അറിവുണ്ടായിരുന്നോ എന്നതുപോലും പരിശോധിക്കേണ്ടതായിരുന്നു. അവരെ ചോദ്യം ചെയ്തെന്നതിന് പോലും വ്യക്തതയില്ല.
ക്വട്ടേഷൻ നൽകിയത് സ്ത്രീയാണെന്ന് ആദ്യം പറഞ്ഞ സുനി, പിന്നീട് നടൻ ദിലീപിന് എഴുതിയ കത്തിൽ അത് മാറ്റിപ്പറഞ്ഞുവെന്നും വിധിന്യായത്തിൽ പറയുന്നു. ഈ വൈരുദ്ധ്യം നിലനിൽക്കെ, കൃത്യത്തിന് പിന്നിലെ സ്ത്രീ സാന്നിധ്യത്തെക്കുറിച്ച് വിശദമായ അന്വേഷണം നടത്തേണ്ടത് അത്യാവശ്യമായിരുന്നു എന്നും കോടതി അടിവരയിടുന്നു. അന്വേഷണ സംഘത്തിൻ്റെ വീഴ്ചകൾ വിധിന്യായത്തിൽ സുവ്യക്തമായി രേഖപ്പെടുത്തിയിട്ടുണ്ട്.