തമിഴിൽ മുൻ നിര നായകന്മാരെ വച്ച് സൂപ്പർ ഹിറ്റ് സിനിമകൾ ഒരുക്കിയ സംവിധായകനാണ് എസ്. എഴിൽ. വിജയ് ( തുള്ളാത മനമും തുള്ളും) , അജിത് ( പൂവെല്ലാം ഉൻ വാസം), ജയം രവി ( ദിപാവലി ), ശിവ കാർത്തികേയൻ ( മനംകൊത്തി പറവൈ ) , വിഷ്ണു വിശാൽ ( വേലൈന്ന് വന്താ വെള്ളൈ ക്കാരൻ ) തുടങ്ങിയ എഴിൽ ചിത്രങ്ങളെല്ലാം സൂപ്പർ ഹിറ്റുകളായിരുന്നു.
പത്തു വർഷം മുമ്പ് വിമലിനെ നായനാക്കി എഴിൽ അണിയിച്ചൊരുക്കിയ ജനപ്രിയ ചിത്രമായിരുന്നു ദേസിങ്കു രാജ . ഇപ്പോൾ ഇതിൻ്റെ രണ്ടാം ഭാഗമായ ' ദേസിങ്കു രാജ 2 ' - ൻ്റെ അവസാനഘട്ട പണികളിലാണ് അദ്ദേഹം. ചിത്രം ജൂലൈ 11 - നു റിലീസ് ചെയ്യുമെന്ന് പ്രഖ്യാപിച്ച് പോസ്റ്ററും അണിയറക്കാർ പുറത്തു വിട്ടു.
വിമൽ തന്നെയാണ് രണ്ടാം ഭാഗത്തിലെയും നായകൻ. ഉപനായകനായി പുതുമുഖം ജനാ സിനിമയിൽ അരങ്ങേറ്റം കുറിക്കുന്നു. ആദ്യന്തം നർമ്മ രസപ്രദമായ ആക്ഷൻ സിനിമയാണ് ' ദേസിങ്കു രാജ 2 '. തെലുങ്കിൽ രംഗസ്ഥല ' എന്ന ചിത്രത്തിലൂടെ ശ്രദ്ധേയയായ പൂജിതാ പൊന്നാടയാണ് നായിക. തെലുങ്ക് താരം ഹർഷിത മറ്റൊരു നായികയാണ്.
മധുമിത, രവി മറിയാ, റോബോ ശങ്കർ, സിങ്കം പുലി, കിങ്സ്‌ലി, പുകഴ്, ചാംസ്, മൊട്ട രാജേന്ദ്രൻ, വയ്യാപുരി, ലൊള്ളു സ്വാമിനാഥൻ , മധുര മുത്ത്, വിജയ് ടിവി വിനോദ് എന്നിങ്ങനെ ഒട്ടേറെ നടീ നടന്മാർ മറ്റു കഥാപാത്രങ്ങളെ അവതരിപ്പിക്കുന്നു . ഇൻഫിനിറ്റി ക്രിയേഷൻ്റെ ബാനറിൽ പി. രവിചന്ദ്രൻ നിർമ്മിക്കുന്ന മധുമിത ചിത്രത്തിൻ്റെ സംഗീത സംവിധായകൻ വിദ്യാ സാഗറാണ്. പൂവെല്ലാം ഉൻ വാസം എന്ന സിനിമക്ക് ശേഷം ഈ ഹിറ്റ് കോംബോ ഒന്നിക്കുന്നു എന്നത് സവിഷേതയാണ്.