കൊച്ചി : ടെലിവിഷന് അവതാരകയും നടിയുമായ ആര്യ ബാബുവും ബിഗ് ബോസ് സീസണ് ആറിലെ താരവും കൊറിയോഗ്രാഫറുമായ ഡിജെ സിബിനും വിവാഹനിശ്ചയ ചിത്രങ്ങൾ പങ്കുവെച്ചു . സാമൂഹ്യമാധ്യമങ്ങളിലൂടെ ആര്യ തന്നെയാണ് ഇക്കാര്യം അറിയിച്ചത്.
'ഞങ്ങൾക്ക് ഏറെ പ്രിയപ്പെട്ട ദിവസം. ഒരുപാട് ഒരുപാട് സന്തോഷം, ആനന്ദക്കണ്ണീർ, സ്നേഹം, ആത്മബന്ധം അങ്ങനെ എല്ലാംകൊണ്ടും നിറഞ്ഞ ഒരു ദിവസം. ഞങ്ങളും ഞങ്ങളുടെ മകളും ആകാംക്ഷയോടെ കാത്തിരുന്ന ദിനം. ഞങ്ങളെ സ്നേഹിക്കുന്നവർ കാത്തിരുന്ന ദിവസം. ഈ ദിവസത്തെക്കുറിച്ചുള്ള വികാരങ്ങൾ പ്രകടിപ്പിക്കാൻ എനിക്ക് വാക്കുകൾ മതിയാകില്ല. മരിക്കുവോളം ഇത് ഞങ്ങളുടെ ഏറ്റവും പ്രധാനപ്പെട്ട ഓർമയായിരിക്കും', ആര്യ ഇൻസ്റ്റഗ്രാമിൽ കുറിച്ചു.
സീരിയൽ താരം അർച്ചന സുശീലന്റെ സഹോദരനായിരുന്നു ആര്യയുടെ ആദ്യ ഭർത്താവ്. മകൾ പിറന്നശേഷം ഇരുവരും വിവാഹമോചിതരായി. എന്നാൽ ഇപ്പോഴും ഇരുവരും തമ്മിൽ സൗഹൃദമുണ്ട്. മകൾ ആര്യയുടെ സംരക്ഷണയിലാണ്. ആദ്യ ബന്ധത്തില് സിബിന് റയാന് എന്ന മകനുണ്ട്.