നവാഗതനായ ജയൻ നമ്പ്യാർ സംവിധാനം ചെയ്ത് പൃഥ്വിരാജ് നായകനായെത്തിയ ചിത്രമാണ് 'വിലായത്ത് ബുദ്ധ'. കഴിഞ്ഞ ദിവസം തീയറ്ററുകളിൽ എത്തിയ ചിത്രത്തിന് മികച്ച പ്രതികരണമാണ് ലഭിക്കുന്നത്. ഡബിൾ മോഹനായി പൃഥ്വിരാജ് തിളങ്ങിയപ്പോൾ ഭാസ്കരൻമാഷ് എന്ന അതിശക്തമായ കഥാപാത്രമായി ഷമ്മി തിലകനും പകർന്നാടുന്നു.
നാട്ടുകാർക്ക് നാലക്ഷരം പറഞ്ഞുകൊടുത്ത അധ്യാപകനായിരുന്നു മറയൂരുകാരുടെ സ്വന്തം ഭാസ്കരൻ മാഷ്. തന്‍റേടമുള്ള പഞ്ചായത്ത് പ്രസിഡന്‍റ് ആയാണ് ചിത്രത്തിൽ ഷമ്മിയെ അവതരിപ്പിച്ചിരിക്കുന്നത്. ചിത്രം കണ്ട് പുറത്തിറങ്ങുന്നവർ ഒരേ സ്വരത്തിൽ പറയുന്നത്, ഷമ്മിയുടെ സമാനതകളില്ലാത്ത അഭിനയമുഹൂർത്തങ്ങളെ കുറിച്ചാണ്. ചില രംഗങ്ങളിൽ മലയാളത്തിന്‍റെ സ്വന്തം അഭിനയ കുലപതി തിലകനെ തന്നെ അനുസ്മരിപ്പിക്കുന്ന ശരീര ഭാഷയാണ് അദ്ദേഹം പ്രകടിപ്പിച്ചതെന്നാണ് പ്രേക്ഷകരുടെ അഭിപ്രായം.
വ്യത്യസ്ത ഭാവാഭിനയങ്ങൾ മാറി മറിയുന്ന അനന്യമായ കാഴ്ചയാണ് ഷമ്മി തിലകൻ ചിത്രത്തിൽ കാഴ്ചവെച്ചിരിക്കുന്നത്. ചിത്രം ആരംഭിക്കുന്നത് തന്നെ ഭാസ്കരൻ മാഷിന്‍റെ പ്രഭാഷണത്തോടെയാണ്. മാഷിന് നാട്ടിൽ തൂവെള്ള ഭാസ്കരൻ എന്ന മറ്റൊരു വിളിപ്പേരുണ്ട്. എതിരെ നിൽക്കുന്ന പാർട്ടിയിൽ ആരുവന്നാലും ഇപ്പുറത്ത് ഭാസ്കരൻ മാഷുണ്ടെങ്കിൽ പാർട്ടിക്ക് വിജയം ഉറപ്പെന്നാണ് അണികളുടേയും ആത്മവിശ്വാസം. അദ്ദേഹത്തിന്റെ ജീവിതത്തിൽ ഉണ്ടാകുന്ന മാറ്റവും തുടര്‍ന്നുണ്ടാകുന്ന സംഭവവികാസങ്ങളുമൊക്കെയാണ് സിനിമയുടെ ഇതിവൃത്തം.
ഇതിനു പിന്നാലെയാണ് ഡബിൾ മോഹനന്‍റെ വരവും ചന്ദനവേട്ടയും തുടർ സംഭവങ്ങളുമൊക്കെ അരങ്ങേറുന്നത്. ചിത്രത്തിൽ നേർക്കുനേർ പോരടിക്കുന്ന ഭാസ്കരൻ മാഷിനെയും ഡബിൾ മോഹനനെയുമാണ് കാണാൻ സാധിക്കുന്നത്. ഇവർ ഒരുമിച്ചെത്തുന്ന സീനുകൾ പ്രേക്ഷകരെ പിടിച്ചിരുത്തുന്നുണ്ട്. ചിത്രത്തിലെ ഷമ്മി തിലകന്റെ കഥാപാത്രം ആരെയും ഞെട്ടിപ്പിക്കുന്നതാണ്. അദ്ദേഹത്തിന്റെ കരിയറിൽ തന്നെ ഏറെ വേറിട്ട വേഷമാണ് ഭാസ്കരൻമാഷിന്റേത്. സമീപകാല സിനിമകളിൽ തന്നെ വ്യത്യസ്തമായ കഥാപാത്രത്തെയാണ് ഷമ്മി തിലകൻ ‘വിലായത്ത് ബുദ്ധ’ യിൽ അവതരിപ്പിച്ചിരിക്കുന്നത്.