കൊച്ചി: നടൻ ഷൈൻ ടോം ചാക്കോ പ്രതിയായ ലഹരിമരുന്ന് കേസിൽ പോലീസിന് തിരിച്ചടി. ഷൈൻ ടോം ചാക്കോ ലഹരിമരുന്ന് ഉപയോഗിച്ചുവെന്ന് ശാസ്ത്രീയമായി തെളിയിക്കാൻ കഴിയില്ലെന്ന് ഫോറൻസിക് പരിശോധനാ റിപ്പോർട്ട് വ്യക്തമാക്കുന്നു. ഇന്നലെയാണ് ഇത് സംബന്ധിച്ച രാസപരിശോധനാ ഫലം പുറത്തുവന്നത്.(Relief for actor Shine Tom Chacko in drug case, Forensic report finds no evidence of drug use)
കൊച്ചിയിലെ ഹോട്ടൽ മുറിയിൽ ഷൈൻ ടോം ചാക്കോയും സുഹൃത്തും ചേർന്ന് ലഹരിമരുന്ന് ഉപയോഗിച്ചുവെന്നായിരുന്നു പോലീസിന്റെ കണ്ടെത്തൽ. കൊച്ചി സിറ്റി പോലീസിന്റെ ലഹരി വിരുദ്ധ സ്ക്വാഡ് ഹോട്ടലിൽ പരിശോധനയ്ക്ക് എത്തിയപ്പോൾ ഷൈൻ ടോം ചാക്കോ അവിടെനിന്നും ഇറങ്ങിയോടിയത് വലിയ വാർത്തയായിരുന്നു. ഇത് ലഹരി ഉപയോഗിച്ചതുകൊണ്ടാണെന്ന സംശയം അന്ന് പോലീസ് ശക്തമായി ഉന്നയിച്ചിരുന്നു.
സംഭവത്തിന് പിന്നാലെ നടനെ മണിക്കൂറുകളോളം പോലീസ് ചോദ്യം ചെയ്യുകയും സാമ്പിളുകൾ ശേഖരിച്ച് ഫോറൻസിക് പരിശോധനയ്ക്ക് അയക്കുകയും ചെയ്തു. കേരളത്തിൽ വലിയ കോളിളക്കം സൃഷ്ടിച്ച ഈ കേസിൽ നിർണ്ണായക തെളിവായി പോലീസ് കരുതിയിരുന്നത് ഫോറൻസിക് ഫലത്തെയായിരുന്നു.