ഈ വർഷത്തെ കേരള രാജ്യാന്തര ചലച്ചിത്രോത്സവത്തിലെ (IFFK) മലയാള സിനിമകളുടെ തിരഞ്ഞെടുപ്പ് പൂർത്തിയായി. മലയാളത്തിൽ നിന്നുള്ള രണ്ട് ചിത്രങ്ങളാണ് അന്താരാഷ്ട്ര മത്സരവിഭാഗത്തിൽ മാറ്റുരയ്ക്കുന്നത്. സഞ്ജു സുരേന്ദ്രന്റെ ‘ഖിഡ്കി ഗാവ്’, ഉണ്ണികൃഷ്ണൻ ആവളയുടെ ‘ലൈഫ് ഓഫ് എ ഫാലസ്’ എന്നീ ചിത്രങ്ങളാണ് മത്സരത്തിനായി തിരഞ്ഞെടുക്കപ്പെട്ടത്. ഇതിൽ സഞ്ജു സുരേന്ദ്രന്റെ ‘ഖിഡ്കി ഗാവ്’ നേരത്തെ ദക്ഷിണ കൊറിയയിലെ ബുസാൻ അന്താരാഷ്ട്ര ചലച്ചിത്രോത്സവത്തിൽ ഹൈലൈഫ് വിഷൻ അവാർഡ് സ്വന്തമാക്കിയിരുന്നു എന്നത് ശ്രദ്ധേയമാണ്.
കൂടാതെ, ‘മലയാളം സിനിമ ടുഡേ’ വിഭാഗത്തിലേക്ക് 12 സിനിമകൾ തിരഞ്ഞെടുക്കപ്പെട്ടിട്ടുണ്ട്. ഇതിൽ നടനും നിർമ്മാതാവുമായ രാജേഷ് മാധവന്റെ ആദ്യ സംവിധാന സംരംഭമായ ‘പെണ്ണും പൊറാട്ടും’ പ്രദർശിപ്പിക്കും. ജിയോ ബേബിയുടെ ‘എബ്ബ്’ ആണ് ഈ വിഭാഗത്തിലെ മറ്റൊരു പ്രധാന ചിത്രം.
സമസ്താലോകാ (ഷെറി ഗോവിന്ദൻ), അംബ്രോസിയ (ആദിത്യാ ബേബി), കാത്തിരിപ്പ് (നിപിൻ നാരായണൻ), ശവപ്പെട്ടി (റിനോഷൻ കെ.), ആദിസ്നേഹത്തിന്റെ വിരുന്നുമേശ (മിനി ഐ.ജി.), ശേഷിപ്പ് (ശ്രീജിത്ത് എസ്. കുമാർ, ഗ്രിറ്റോ വിൻസന്റ്), അന്യരുടെ ആകാശങ്ങൾ (ശ്രീകുമാർ കെ.), ഒരു അപസർപ്പക കഥ (അരുൺ വർധൻ), മോഹം (ഫാസിൽ റസാഖ്), ചാവു കല്യാണം (വിഷ്ണു ബി. ബീന) എന്നിവയാണ് ഈ വിഭാഗത്തിൽ പ്രദർശിപ്പിക്കുന്ന മറ്റ് ചിത്രങ്ങൾ.
ഡിസംബർ 12 മുതൽ 19 വരെയാണ് ഈ വർഷത്തെ ഐഎഫ്എഫ്കെ തിരുവനന്തപുരത്ത് അരങ്ങേറുന്നത്.