Operation Numkhor : ഓപ്പറേഷൻ നുംഖോർ : ദുൽഖർ സൽമാൻ്റെ വീട്ടിൽ നിന്നും പിടിച്ചെടുത്തത് 2 വാഹനങ്ങളെന്ന് വിവരം

കൊച്ചി : ഓപ്പറേഷൻ നുംഖോറിൻ്റെ ഭാഗമായി കസ്റ്റംസ് നടത്തിയ റെയ്ഡിൽ നടൻ ദുൽഖർ സൽമാന്റെ വീട്ടിൽ നിന്നും 2 വാഹനങ്ങൾ പിടിച്ചെടുത്തതായി വിവരം. ഭൂട്ടാനിലെ നിന്നും ആഡംബര കാറുകൾ നികുതി വെട്ടിച്ച് ഇന്ത്യയിലേക്ക് കടത്തിയെന്ന ഇൻ്റലിജൻസ് വിവരത്തിൻ്റെ അടിസ്ഥാനത്തിലാണ് പരിശോധന നടത്തിയത്.(Operation Numkhor customs raid)

കോഴിക്കോട്, മലപ്പുറം ജില്ലകളിൽ നിന്നായി 11 വാഹനങ്ങളും പിടിച്ചെടുത്തു. ദുൽഖറിന്റെ വാഹനങ്ങൾ പിടിച്ചെടുത്തതിന് പിന്നാലെ കൂടുതൽ വാഹനങ്ങൾ ഉണ്ടെങ്കിൽ ഹാജരാക്കണമെന്ന് സമൻസും നൽകിയിട്ടുണ്ട്. ഓപ്പറേഷൻ സംബന്ധിച്ച് വിവരങ്ങൾ നൽകുന്നതിനായി കസ്റ്റംസ് കമ്മീഷ്ണർ വൈകുന്നേരം മാധ്യമങ്ങളെ കാണും.

ഇന്ത്യയിലേക്ക് ഭൂട്ടാനിൽ നിന്നും ഇറക്കുമതി ചെയ്തത് 198 വാഹനങ്ങൾ ആണെന്ന് കണ്ടെത്തൽ. കേരളത്തിൽ എത്രയെണ്ണം ഉണ്ടെന്ന കാര്യങ്ങൾ അധികൃതർ പരിശോധിച്ച് വരികയാണ്. 198 വാഹനങ്ങൾ ഇറക്കുമതി വാഹന ഡീലര്‍മാരിൽ നിന്ന് അടക്കം ലഭിച്ച കണക്കുകളുടെ അടിസ്ഥാനത്തിലാണ്. മുഴുവൻ വാഹനങ്ങളും കേന്ദ്രീകരിച്ച് കസ്റ്റംസ് അന്വേഷണം നടത്തുമെന്നാണ് വിവരം. പിടിച്ചെടുത്ത വാഹനങ്ങൾ കരിപ്പൂർ എയർപോർട്ടിലെ കസ്റ്റംസ് ഓഫിസിൽ എത്തിക്കും. 7 ഇടങ്ങളിൽ പരിശോധന നടക്കുന്നുണ്ട്.

കേന്ദ്ര സർക്കാരിലെ ഉന്നത ഉദ്യോഗസ്ഥരും വാഹനങ്ങൾ വാങ്ങിയവരുടെ കൂട്ടത്തിലുണ്ട്. നാഷണൽ ടിബി ഇന്‍സ്റ്റിറ്റ്യൂട്ട് ഡയറക്ടര്‍, സെന്‍ട്രൽ സിൽക്ക് ബോര്‍ഡ് മെമ്പര്‍ സെക്രട്ടറി എന്നിവരാണിവർ. അതേസമയം, അന്വേഷണത്തിൻ്റെ ഭാഗമായി നടന്മാരായ പൃഥ്വിരാജ്, ദുൽഖർ സൽമാൻ എന്നിവരുടെ വീടുകളിലും കസ്റ്റംസ് റൈഡ് നടത്തി.