മുംബൈ: പ്രശസ്ത ബോളിവുഡ് നടി നോറ ഫത്തേഹി സഞ്ചരിച്ചിരുന്ന കാർ അപകടത്തിൽപ്പെട്ടു. മുംബൈയിൽ നടന്ന സൺബേൺ മ്യൂസിക് ഫെസ്റ്റിവലിൽ പങ്കെടുക്കാൻ പോകുന്നതിനിടെ ശനിയാഴ്ച വൈകുന്നേരം നാല് മണിയോടെയായിരുന്നു സംഭവം. അപകടത്തിൽ നിന്നും താരം അത്ഭുതകരമായി രക്ഷപ്പെട്ടു.(Nora Fatehi's car met with an accident in Mumbai)
മദ്യപിച്ചെത്തിയ ഒരാൾ ഓടിച്ചിരുന്ന വാഹനം നോറ സഞ്ചരിച്ചിരുന്ന കാറിൽ ഇടിക്കുകയായിരുന്നുവെന്ന് മുംബൈ പോലീസ് സ്ഥിരീകരിച്ചു. അപകടത്തെത്തുടർന്ന് നടിയെ ഉടൻ തന്നെ അടുത്തുള്ള ആശുപത്രിയിൽ പ്രാഥമിക പരിശോധനകൾക്കായി പ്രവേശിപ്പിച്ചു. പരിശോധനകൾക്ക് ശേഷം പരിക്കുകളൊന്നുമില്ലെന്നും ആരോഗ്യനില തൃപ്തികരമാണെന്നും ഡോക്ടർമാർ അറിയിച്ചതോടെ ആരാധകരുടെ ആശങ്ക ഒഴിവായി.
അപകടമുണ്ടാക്കിയ ഡ്രൈവർക്കെതിരെ പോലീസ് കർശന നടപടികൾ സ്വീകരിച്ചു. ഡ്രൈവർ മദ്യപിച്ചിരുന്നതായി വൈദ്യപരിശോധനയിൽ തെളിഞ്ഞു. അശ്രദ്ധമായും മദ്യപിച്ചും വാഹനമോടിച്ചതിന് ഇയാൾക്കെതിരെ പോലീസ് കേസെടുക്കുകയും കസ്റ്റഡിയിലെടുക്കുകയും ചെയ്തു.
കാർ അപകടത്തിന്റെ ഞെട്ടൽ മാറും മുൻപേ തന്നെ നോറ ഫത്തേഹി സൺബേൺ മേളയിലെ തന്റെ നിശ്ചയിച്ച പ്രകടനം പൂർത്തിയാക്കി. താരത്തിന്റെ തൊഴിലിനോടുള്ള അർപ്പണബോധത്തെ സോഷ്യൽ മീഡിയയിൽ ആരാധകർ അഭിനന്ദിക്കുകയാണ്.