സ്ട്രീമിംഗ് ലോകത്തെ ചരിത്രം തിരുത്തിക്കൊണ്ട് ഏറ്റവും വലിയ ഉടമ്പടി. ആഗോള സ്ട്രീമിംഗ് ഭീമന്മാരായ നെറ്റ്ഫ്ലിക്സ്, പ്രമുഖ മാധ്യമ കമ്പനിയായ വാർണർ ബ്രോസ്. ഡിസ്കവറിയുടെ (WBD) സ്റ്റുഡിയോകളും സ്ട്രീമിംഗ് വിഭാഗവും ഏറ്റെടുക്കാൻ ധാരണയായി. 72 ബില്യൺ ഡോളറിനാണ് (ഏകദേശം 5.9 ലക്ഷം കോടി രൂപ) ഈ ചരിത്രപരമായ ഏറ്റെടുക്കൽ കരാർ ഉറപ്പിച്ചത്. ഇതോടെ ഹോളിവുഡിലെ ഏറ്റവും പഴക്കമുള്ളതും മൂല്യവത്തായതുമായ ആസ്തികളിൽ പലതും നെറ്റ്ഫ്ലിക്സിന്റെ കീഴിൽ വരും.
പല ആഴ്ചകളായി നീണ്ടുനിന്ന കടുത്ത ലേലപ്പോരാട്ടത്തിന് ഒടുവിലാൻ നെറ്റ്ഫ്ലിക്സ് വിജയികളായത്. വാർണർ ബ്രോസ് ഡിസ്കവറിയെ മൊത്തമായി വാങ്ങാൻ ശ്രമിച്ച പാരമൗണ്ട് സ്കൈഡാൻസ്, കോംകാസ്റ്റ് തുടങ്ങിയ എതിരാളികളുടെ വാഗ്ദാനങ്ങളെ മറികടന്നാണ് നെറ്റ്ഫ്ലിക്സ് ഈ വമ്പൻ കരാർ നേടിയത്. ഈ ഏറ്റെടുക്കലിലൂടെ 'ഗെയിം ഓഫ് ത്രോൺസ്', 'ഹാരി പോട്ടർ', 'ഡിസി കോമിക്സ്' ഫ്രാഞ്ചൈസികൾ ഉൾപ്പെടെയുള്ള വാർണർ ബ്രോസിന്റെ പ്രധാന ഉള്ളടക്ക ശേഖരം നെറ്റ്ഫ്ലിക്സിന്റെ സ്വന്തമാകും.
ലോകമെമ്പാടുമുള്ള 130 ദശലക്ഷം വരിക്കാരുള്ള എച്ച്ബിഒ മാക്സ് (HBO Max) സ്ട്രീമിംഗ് സേവനവും ഇനി നെറ്റ്ഫ്ലിക്സിന്റെ ഭാഗമാകും. ഇത് സ്ട്രീമിംഗ് ലോകത്ത് നെറ്റ്ഫ്ലിക്സിന്റെ ആധിപത്യം കൂടുതൽ ശക്തമാക്കുകയും, വാൾട്ട് ഡിസ്നി അടക്കമുള്ള എതിരാളികൾക്ക് കടുത്ത വെല്ലുവിളിയുയർത്തുകയും ചെയ്യും.
എന്നാൽ, ഈ കരാർ നിയമപരമായി വലിയ വെല്ലുവിളികൾ നേരിടാൻ സാധ്യതയുണ്ട്. ലോകത്തിലെ ഏറ്റവും വലിയ സ്ട്രീമിംഗ് സേവനദാതാവ് ഒരു പ്രധാന എതിരാളിയെ ഏറ്റെടുക്കുന്നത് വിപണിയിലെ മത്സരത്തെ ഇല്ലാതാക്കുമെന്ന ആശങ്കകൾ അമേരിക്കയിലും യൂറോപ്പിലും ശക്തമാണ്. എങ്കിലും, പുതിയ കരാർ ഉപഭോക്താക്കൾക്ക് കൂടുതൽ മൂല്യം നൽകുമെന്നാണ് നെറ്റ്ഫ്ലിക്സിന്റെ വാദം.
"ലോകത്തെ വിനോദിപ്പിക്കുക എന്നതാണ് ഞങ്ങളുടെ ലക്ഷ്യം. 'കാസബ്ലാങ്ക', 'ഹരി പോട്ടർ' തുടങ്ങിയ വാർണർ ബ്രോസിന്റെ ക്ലാസിക് ശേഖരത്തെ 'സ്ട്രേഞ്ചർ തിങ്സ്', 'സ്ക്വിഡ് ഗെയിം' തുടങ്ങിയ ഞങ്ങളുടെ തനത് ഉള്ളടക്കങ്ങളുമായി സംയോജിപ്പിക്കുമ്പോൾ, അടുത്ത നൂറ്റാണ്ടിലെ കഥ പറച്ചിൽ എന്തായിരിക്കണമെന്ന് നിർവചിക്കാൻ ഞങ്ങൾക്ക് സാധിക്കും." - നെറ്റ്ഫ്ലിക്സ് സഹ-സിഇഒ ടെഡ് സരണ്ടോസ് പ്രസ്താവനയിൽ പറഞ്ഞു.
വാർണർ ബ്രോസ്. ഡിസ്കവറിയുടെ കേബിൾ ടിവി നെറ്റ്വർക്കുകൾ (ഡിസ്കവറി ഗ്ലോബൽ) വേർതിരിച്ച് മറ്റൊരു കമ്പനിയാക്കി മാറ്റിയ ശേഷമായിരിക്കും ഏറ്റെടുക്കൽ പൂർത്തിയാക്കുക. ഈ നടപടികൾ 2026-ന്റെ മൂന്നാം പാദത്തോടെ പൂർത്തിയാക്കാനാണ് നെറ്റ്ഫ്ലിക്സ് ലക്ഷ്യമിടുന്നത്. ഏറ്റെടുക്കലിന് ശേഷവും വാർണർ ബ്രോസിന്റെ സിനിമകൾ തിയേറ്ററുകളിൽ റിലീസ് ചെയ്യുന്നത് തുടരുമെന്നും നെറ്റ്ഫ്ലിക്സ് ഉറപ്പ് നൽകിയിട്ടുണ്ട്.