മികച്ച പ്രതികരണം നേടി മുന്നേറുകയാണ് ഗുഡ്‍വില്‍ എന്‍റര്‍ടെയ്ന്‍‍മെന്‍റ്സിൻ്റെ 'നാരായണീൻ്റെ മൂന്നാണ്മക്കൾ'. കുടുംബഹൃദയം തൊട്ട, മനസ്സറിഞ്ഞ ഒരു സിനിമയാണ് ഇതെന്നാണ് കണ്ടവർ എല്ലാവരും പറയുന്നത്. ശരിക്കും ഒരു ഫീൽഗുഡ് മൂവി തന്നെയാണിത്.(Narayaneente Moonnaanmakkal)
ഒരു വീട്ടിൽ നടക്കുന്ന കാര്യങ്ങൾ അത്രയും തനിമയോടെ അവതരിപ്പിക്കുന്ന ഈ സിനിമ, കണ്ടിറങ്ങുന്നവരുടെ മുഖത്തും ഒരു പുഞ്ചിരിയുണ്ട്. ഏറെ ഇഷ്ടമായി എന്ന് പറയുന്നവർ സൂചിപ്പിക്കുന്ന മറ്റൊരു കാര്യം ചിത്രത്തിലെ അഭിനേതാക്കളെ കുറിച്ചുള്ളതാണ്. മൂന്നു പേരും മത്സരിച്ച് അഭിനയിച്ചിരിക്കുകയാണ് എന്നാണ് അവർ പറയുന്നത്. എന്തായാലും നാരായണിയുടെ മൂന്നാണ്മക്കളെയും സിനിമാപ്രേമികൾ ഏറ്റെടുത്തു.
ശരണ്‍ വേണുഗോപാൽ രചനയും സംവിധാനവും നിർവഹിക്കുന്ന ചിത്രത്തിൽ ജോജു ജോര്‍ജ്, സുരാജ് വെഞ്ഞാറമൂട്, അലന്‍സിയര്‍ ലോപ്പസ് എന്നിവരാണ് പ്രധാന കഥാപാത്രങ്ങളായെത്തുന്നത്. തോമസ് മാത്യു, ഗാർഗി ആനന്ദൻ, ഷെല്ലി എൻ കുമാർ, സജിത മഠത്തില്‍, സരസ ബാലുശ്ശേരി എന്നിവരാണ് ചിത്രത്തിലെ മറ്റ് പ്രധാന അഭിനേതാക്കള്‍. ഒരു നാട്ടിൻ പുറത്തെ ഒരു തറവാട് വീട് കേന്ദ്രീകരിച്ചാണ് സിനിമയുടെ കഥാതന്തു.