മുംബൈ: കഴിഞ്ഞ കുറച്ചുനാളുകളായി സോഷ്യൽ മീഡിയയിൽ പടരുന്ന ധനുഷ്-മൃണാൾ വിവാഹ വാർത്തകൾക്ക് അന്ത്യം കുറിച്ച് നടി മൃണാൾ താക്കൂർ (Mrunal Thakur Dhanush Wedding Rumors). ഇത്തരം വാർത്തകളെ തമാശയോടെയാണ് താൻ കാണുന്നതെന്നും ഗോസിപ്പുകൾ പടച്ചുവിട്ടവർക്ക് നന്ദിയുണ്ടെന്നും താരം ഒരു ദേശീയ മാധ്യമത്തിന് നൽകിയ അഭിമുഖത്തിൽ പറഞ്ഞു.
“ഞാൻ മൂന്നോ പത്തോ കോടി രൂപ ചെലവാക്കിയാൽ പോലും എനിക്ക് ഇത്രയും വലിയ പബ്ലിസിറ്റി ലഭിക്കില്ല. അതുകൊണ്ട് ഈ വ്യാജ വാർത്തകൾ പ്രചരിപ്പിച്ച എല്ലാവർക്കും വലിയ നന്ദി,” എന്ന് മൃണാൾ പരിഹാസരൂപേണ പറഞ്ഞു. വ്യാജ വാർത്തകൾ അതിരുവിട്ടതോടെയും സ്വന്തം മേൽവിലാസം വരെ പ്രചരിച്ചതോടെയും കാര്യങ്ങൾ നിയന്ത്രിക്കാൻ ഒരു പിആർ (PR) ടീമിനെ നിയമിക്കേണ്ടി വന്നതായും താരം വെളിപ്പെടുത്തി.ശരിയായ സമയത്ത് തന്റെ പങ്കാളിയെ താൻ തന്നെ കണ്ടെത്തുമെന്നും നിലവിൽ പ്രചരിക്കുന്ന വാർത്തകളിൽ വസ്തുതയില്ലെന്നും മൃണാൾ വ്യക്തമാക്കി.
മൃണാൾ നായികയായ ‘സൺ ഓഫ് സർദാർ 2’ വിന്റെ പ്രീമിയറിനിടെ ധനുഷും മൃണാളും ഒന്നിച്ചുള്ള ഒരു വീഡിയോ വൈറലായതോടെയാണ് പ്രണയവാർത്തകൾ പ്രചരിച്ചു തുടങ്ങിയത്. പിന്നീട് മൃണാളിന്റെ പിറന്നാൾ ആഘോഷത്തിലും ധനുഷ് നായകനായ ‘തേരെ ഇഷ്ക് മേം’ സിനിമയുടെ സക്സസ് പാർട്ടിയിലും ഇരുവരും പങ്കെടുത്തത് വാർത്തകൾക്ക് ആക്കം കൂട്ടി. എന്നാൽ ധനുഷ് തന്റെ നല്ലൊരു സുഹൃത്ത് മാത്രമാണെന്നാണ് മൃണാൾ പറയുന്നത്.
Story Summary:
Actress Mrunal Thakur clarifies wedding rumors with Dhanush, stating that she takes the gossip sportingly and thanks those spreading it for the “free publicity” worth crores.
