തിരുവനന്തപുരം: തെലങ്കാന മുഖ്യമന്ത്രി രേവന്ത് റെഡ്ഡിക്കെതിരെ മുഖ്യമന്ത്രി പിണറായി വിജയൻ നടത്തിയ മറുപടി പരാമർശത്തെ പിന്തുണച്ച് നടി മാലാ പാർവ്വതി (Maala Parvathi Facebook Post Pinarayi Vijayan). രേവന്ത് റെഡ്ഡിയുടെ അധിക്ഷേപത്തിന് ഇത്തരമൊരു മറുപടി തന്നെയാണ് വേണ്ടതെന്നും മുഖ്യമന്ത്രി കേരളത്തിന്റെ മാനം കാത്തെന്നും താരം സോഷ്യൽ മീഡിയയിൽ കുറിച്ചു.
“തെലങ്കാന മുഖ്യമന്ത്രി, കേരള മുഖ്യമന്ത്രിയ്ക്കയച്ച ഔദ്യോഗിക കത്തിൽ ‘പോ മോനെ’ എന്ന് അപമാനിച്ചതിന് ഇത് തന്നെയാണ് മറുപടി! മുഖ്യമന്ത്രി കേരളത്തിന്റെ മാനം കാത്തു! പിന്നല്ലാതെ!” രേവന്ത് റെഡ്ഡിയുടെ മുൻപത്തെ പരാമർശങ്ങളോടുള്ള കടുത്ത വിയോജിപ്പാണ് നടി തന്റെ കുറിപ്പിലൂടെ പ്രകടിപ്പിച്ചത്.
തിരുവനന്തപുരത്തെ തിരഞ്ഞെടുപ്പ് പ്രചാരണത്തിനിടെ മോഹൻലാൽ സിനിമയിലെ പ്രശസ്തമായ മാസ് ഡയലോഗ് അനുകരിച്ച് ‘നീ പോ മോനേ വിജയാ’ എന്ന് രേവന്ത് റെഡ്ഡി പിണറായി വിജയനെ വിമർശിച്ചിരുന്നു. പിണറായി വിജയന്റെ ‘എക്സ്പയറി ഡേറ്റ്’ കഴിഞ്ഞുവെന്നും കേരളത്തിൽ യുഡിഎഫ് അധികാരത്തിൽ വരുമെന്നും അദ്ദേഹം പരിഹസിച്ചു.
രേവന്ത് റെഡ്ഡിയുടെ ആക്ഷേപങ്ങൾക്ക് അക്കമിട്ട് മറുപടി നൽകാൻ ഇപ്പോൾ സമയമില്ലെന്ന് പറഞ്ഞ പിണറായി വിജയൻ, മുഖ്യമന്ത്രി എന്ന നിലയിൽ അദ്ദേഹം പാലിക്കേണ്ട മര്യാദകളെക്കുറിച്ച് ഓർമ്മിപ്പിച്ചു. “ഡാഷ് മോനേ രേവന്താ, മറുപടി വരുന്നുണ്ട് എന്ന് മാത്രമേ ഇപ്പോൾ പറയുന്നുള്ളൂ” എന്നായിരുന്നു പിണറായി വിജയന്റെ നാടകീയമായ പ്രതികരണം.
നിയമസഭാ തിരഞ്ഞെടുപ്പിന്റെ ചൂടിൽ രണ്ട് മുഖ്യമന്ത്രിമാർ തമ്മിലുള്ള ഈ വാക്പോര് കേരള രാഷ്ട്രീയത്തിൽ വലിയ ചർച്ചയായിരിക്കുകയാണ്. ഇതിനിടയിലാണ് സിനിമാ മേഖലയിൽ നിന്നുള്ള പിന്തുണയുമായി മാലാ പാർവ്വതി രംഗത്തെത്തിയത്.
Story Summary:
Actress Maala Parvathi has come out in support of Kerala CM Pinarayi Vijayan following his sharp rebuttal to Telangana CM Revanth Reddy. The controversy began when Revanth Reddy, during an election campaign in Thiruvananthapuram, used a famous movie dialogue to mock Pinarayi Vijayan, saying, “Nee Po Mone Vijaya.” In response, Pinarayi Vijayan hinted at a future counter-attack, using a similar tone. Maala Parvathi stated that the CM’s response was necessary to protect the dignity of Kerala.
