ബെംഗളൂരു: പ്രമുഖ കന്നഡ സീരിയൽ നടി സി.എം. നന്ദിനിയെ (26) കെങ്കേരിയിലെ വാടകവീട്ടിൽ ആത്മഹത്യ ചെയ്ത നിലയിൽ കണ്ടെത്തി. ജനാലക്കമ്പിയിൽ ഷാൾ ഉപയോഗിച്ച് തൂങ്ങിയ നിലയിലായിരുന്നു മൃതദേഹം. വ്യക്തിപരമായ പ്രശ്നങ്ങളും കടുത്ത മാനസിക വിഷമവുമാണ് മരണത്തിന് പിന്നിലെന്ന് സൂചിപ്പിക്കുന്ന ആത്മഹത്യാക്കുറിപ്പ് പൊലീസ് സംഭവസ്ഥലത്തുനിന്ന് കണ്ടെടുത്തിട്ടുണ്ട്.(Kannada actress CM Nandini found dead inside her house, Suicide note recovered)
അഭിനയരംഗത്ത് സജീവമാകാൻ ആഗ്രഹിച്ചിരുന്ന നന്ദിനിക്ക് മേൽ കുടുംബത്തിൽ നിന്ന് കടുത്ത സമ്മർദ്ദമുണ്ടായിരുന്നതായി പോലീസ് പറയുന്നു. 2019-ൽ സർക്കാർ സർവീസിലിരിക്കെ അന്തരിച്ച പിതാവിന് പകരമായി, ആശ്രിത നിയമനത്തിലൂടെ സർക്കാർ ജോലിയിൽ പ്രവേശിക്കാൻ വീട്ടുകാർ നന്ദിനിയെ നിർബന്ധിച്ചിരുന്നു.
അഭിനയ ജീവിതം ഉപേക്ഷിച്ച് വിവാഹിതയാകണമെന്ന കുടുംബത്തിന്റെ ആവശ്യത്തിലും നന്ദിനി അതൃപ്തയായിരുന്നു. തന്റെ ഇഷ്ടങ്ങൾക്ക് വിരുദ്ധമായി പ്രവർത്തിക്കേണ്ടി വരുന്നതിലുള്ള മാനസിക വിഷമവും വിഷാദവും നന്ദിനിയെ അലട്ടിയിരുന്നതായി കുറിപ്പിൽ വ്യക്തമാക്കുന്നു.
നന്ദിനിയെ ഫോണിൽ വിളിച്ചിട്ട് കിട്ടാതായതോടെ സുഹൃത്തുക്കൾ താമസസ്ഥലത്തെ വീട്ടുടമസ്ഥനെ വിവരമറിയിക്കുകയായിരുന്നു. തുടർന്ന് നടത്തിയ പരിശോധനയിലാണ് നടിയെ മരിച്ച നിലയിൽ കണ്ടെത്തിയത്. ഉടൻ തന്നെ കെങ്കേരി പൊലീസിനെ വിവരമറിയിച്ചു.