നടൻ വിജയ് ദേവരകൊണ്ട സഞ്ചരിച്ചിരുന്ന കാർ കഴിഞ്ഞ ദിവസം അപകടത്തിൽപെട്ടിരുന്നു. തെലങ്കാനയിലെ ജോഗുലാംബ ഗഡ്‌വാൾ ജില്ലയിലെ ഉണ്ടവല്ലിക്ക് സമീപമായിരുന്നു അപകടം. അപകത്തിൽ നിന്ന് അത്ഭുതകരമായി രക്ഷപ്പെട്ടതിനെ കുറിച്ച് പ്രതികരിച്ചിരിക്കുകയാണ് നടൻ.
കാറിനൊരിടി കിട്ടിയെങ്കിലും ഞങ്ങള്‍ സുരക്ഷിതരാണെന്നാണ് നടൻ സോഷ്യൽ മീഡിയയിൽ പങ്കുവച്ച കുറിപ്പിൽ പറയുന്നത്. സുഖമായിരിക്കുന്നുവെന്നും കുഴപ്പമൊന്നുമില്ലെന്നും സ്‌ട്രെങ്ത് വര്‍ക്കൗട്ടും ചെയ്തു, വീട്ടില്‍ തിരിച്ചെത്തിയതേയുള്ളൂവെന്നും താരം പറയുന്നു. തനിക്ക് തലവേദനയുണ്ട്. പക്ഷേ, ഒരു ബിരിയാണിയും ഉറക്കവും കൊണ്ട് അതുമാറുമെന്നും വാര്‍ത്തകള്‍ കേട്ട് വിഷമിക്കരുതെന്നും വിജയ് കുറിപ്പിൽ പറഞ്ഞു.
സുഹൃത്തുക്കൾക്കൊപ്പം കാറിൽ സഞ്ചരിക്കുന്നതിനിടെയിലാണ് അപകടം നടന്നത്. നടന്റെ വാഹനത്തില്‍ പിന്നില്‍നിന്നെത്തിയ മറ്റൊരു കാര്‍ ഇടിക്കുകയായിരുന്നു. ഇടിയുടെ ആഘാതത്തിൽ വിജയിയുടെ കാറിന് ചെറിയ കേടുപാടുകൾ സംഭവിച്ചിരുന്നു. എന്നാൽ ആർക്കും പരിക്കേറ്റിരുന്നില്ല. അപകടത്തിന് ശേഷം, വിജയ് തന്റെ സുഹൃത്തിന്റെ കാറിൽ ഹൈദരാബാദിലേക്ക് പോയി.