'ഒരു സെക്കന്‍ഡ് ക്ലാസ് യാത്ര' എന്ന ചിത്രത്തിലൂടെ മലയാള സിനിമാ രംഗത്തേക്ക് അരങ്ങേറ്റം കുറിച്ച നടിയാണ് അപര്‍ണ ബാലമുരളി. പിന്നീട് നിരവധി ചിത്രങ്ങളിൽ നടി അഭിനയിച്ചു. മലയാളത്തിന് പുറമെ ഇന്ന് നിരവധി ഭാഷകളില്‍ അപര്‍ണ സിനിമകള്‍ ചെയ്യുന്നുണ്ട്. നിരവധി നായകന്മാരുടെ നായികയായി അഭിനയിച്ചിട്ടുമുണ്ട്. എന്നാലിപ്പോൾ തനിക്ക് കൂടെ അഭിനയിക്കാന്‍ അതിയായ ആഗ്രഹമുള്ള നടന്റെ പേര് വെളിപ്പെടുത്തിയിരിക്കുകയാണ് അപര്‍ണ ബാലമുരളി.
അമിതാഭ് ബച്ചന്റെ കൂടെ അഭിനയിക്കണമെന്നാണ് അപര്‍ണ പറയുന്നത്. ഗൃഹലക്ഷ്മിക്ക് നല്‍കിയ അഭിമുഖത്തിലായിരുന്നു അപര്‍ണ ഇക്കാര്യം പറഞ്ഞത്.
"ഫഹദ് ഫാസിലിനോടൊപ്പം അഭിനയിക്കണമെന്ന് വലിയ ആഗ്രഹം ഉണ്ടായിരുന്നു. അത് തുടക്കത്തിലേ സാധിച്ചു. മറ്റൊന്ന് ഉര്‍വശി ചേച്ചിയോടൊപ്പം അഭിനയിക്കണമെന്നതായിരുന്നു അതും സാധിച്ചു. അമിതാഭ് ബച്ചന്‍ സാറിന്റെ കൂടെ അഭിനയിക്കണമെന്നൊരു ആഗ്രഹമുണ്ട്. അദ്ദേഹത്തിന്റെ ഇഷ്ടപ്പെട്ട സിനിമകളെ കുറിച്ച് ചോദിക്കുമ്പോള്‍ ആദ്യം ഓര്‍മ വരുന്നത് പികുവാണ്." - അപര്‍ണ പറഞ്ഞു.
അതേസമയം, സൂര്യ നായകനായ സൂരറൈ പോട്ര് എന്ന ചിത്രത്തിലെ അഭിനയത്തിന് മികച്ച നടിക്കുള്ള ദേശീയ ചലച്ചിത്ര അവാര്‍ഡ് അപർണക്ക് ലഭിച്ചിരുന്നു. രുധിരം ആണ് അപര്‍ണയുടേതായി ഏറ്റവുമൊടുവില്‍ പുറത്തിറങ്ങിയ ചിത്രം.