ഇന്ത്യൻ സായുധസേനയെ അഭിനന്ദിച്ച് അമിതാഭ് ബച്ചൻ. പണ്ഡിതനും കവിയുമായ തന്റെ പിതാവ് ഹരിവംശ് റായ് ബച്ചന്റെ കവിതാ ശകലങ്ങൾ പങ്കുവെച്ചുകൊണ്ട് ബച്ചൻ സോഷ്യൽ മീഡിയയിൽ കുറിച്ചു. ഏപ്രിൽ 22-ന് നടന്ന, പഹൽഗാം ഭീകരാക്രമണത്തെ കുറിച്ചാണ് അദ്ദേഹം ആദ്യം വിവരിച്ചത്.
തന്റെ ഭർത്താവിനെ ഒരു ഭീകരൻ തൊട്ടടുത്തു നിന്ന് വെടിവെച്ച് കൊല്ലുന്നത് കണ്ട സ്ത്രീയുടെ കാഴ്ചപ്പാടിലൂടെയാണ്, ബച്ചൻ ഈ സംഭവത്തെക്കുറിച്ച് എഴുതിയത്. ‘ജയ് ഹിന്ദ്’ എന്നും ‘ജയ് ഹിന്ദ് കി സേന’ എന്നും എഴുതിയ ശേഷം, തന്റെ ‘അഗ്നിപഥ്’ എന്ന സിനിമയുടെ ഭാഗമായും ഉപയോഗിച്ചിട്ടുള്ള ഹരിവംശ് റായി ബച്ചന്റെ പ്രശസ്തമായ കവിതയും ചേർത്തിട്ടുണ്ട്.
“അവധി ആഘോഷിക്കുന്നതിനിടയിൽ, ആ പിശാച്, നിരപരാധികളായ ഭാര്യാഭർത്താക്കന്മാരെ പുറത്തേക്ക് വലിച്ചിഴച്ചു. അയാൾ ഭർത്താവിനെ നഗ്നനാക്കി. അവനെ വെടിവെക്കാൻ തുടങ്ങിയപ്പോൾ, ഭാര്യ മുട്ടുകുത്തി വീണു കരഞ്ഞുകൊണ്ട് ആവർത്തിച്ച് യാചിച്ചു, “എന്റെ ഭർത്താവിനെ കൊല്ലരുത്.” എന്നാൽ ആ ഭീരുവായ പിശാച്, കടുത്ത ക്രൂരതയോടെ അവളുടെ ഭർത്താവിനെ വെടിവെച്ച് അവളെ വിധവയാക്കി. ഭാര്യ “എന്നെയും കൊല്ലൂ!” എന്ന് നിലവിളിച്ചപ്പോൾ, പിശാച് പറഞ്ഞു, “ഇല്ല! പോയി പ്രധാനമന്ത്രിയോട് പറയൂ.”
ആ നിമിഷം, ആ മകളുടെ മാനസികാവസ്ഥയെക്കുറിച്ച് ഓർത്തപ്പോൾ, ആദരണീയനായ ബാബുജിയുടെ കവിതയിലെ ഒരു വരി എന്റെ മനസിൽ വന്നു: “ഞാൻ ചിതാഭസ്മം കൈകളിൽ വഹിക്കുന്നു, എന്നിട്ടും ലോകം എന്നോട് സിന്ദൂരം ചോദിക്കുന്നു" (ബാബുജിയുടെ ഒരു വരി), പിന്നെ, അവൾക്ക് സിന്ദൂരം നൽകി!! ഓപ്പറേഷൻ സിന്ദൂർ!!! ജയ് ഹിന്ദ്, ഇന്ത്യൻ സൈന്യത്തിന് ജയ് ഹിന്ദ്. നിങ്ങൾ ഒരിക്കലും നിൽക്കരുത്; നിങ്ങൾ ഒരിക്കലും പിന്തിരിയരുത്; നിങ്ങൾ ഒരിക്കലും തലകുനിക്കരുത്. പ്രതിജ്ഞ ചെയ്യുക, പ്രതിജ്ഞ ചെയ്യുക, പ്രതിജ്ഞ ചെയ്യുക! അഗ്നിപഥ്! അഗ്നിപഥ്! അഗ്നിപഥ്.” - ബച്ചൻ കുറിച്ചു.