കൊച്ചി : ഭൂട്ടാനിൽ നിന്നും അനധികൃതമായി ആഡംബര കാറുകൾ ഇന്ത്യയിലേക്ക് കടത്തുന്നതുമായി ബന്ധപ്പെട്ട് ഇ ഡി വീട്ടിൽ പരിശോധന നടത്തുന്നതിനിടെ നടൻ ദുൽഖർ സൽമാൻ കൊച്ചിയിൽ എത്തി. അദ്ദേഹം കസ്റ്റംസിന് മുന്നിൽ ഹാജരായേക്കും.(ED raid in Dulquer Salmaan's house )
രാവിലെ അദ്ദേഹം ചെന്നൈയിലെ വീട്ടിൽ ആയിരുന്നു. ഉച്ചയ്ക്ക് നെടുമ്പാശ്ശേരി വിമാനത്താവളത്തിൽ എത്തിയ നടൻ മാധ്യമങ്ങളോട് പ്രതികരിച്ചില്ല. നേരെ സുഹൃത്തുക്കളോടൊപ്പം കാറിൽ കയറി പോയി. ദുൽഖറിന് നിന്നും വിവരങ്ങൾ തേടുമെന്ന് നേരത്തെ കസ്റ്റംസ് അറിയിച്ചിരുന്നു. അദ്ദേഹം ഉച്ചയ്ക്ക് ശേഷം കസ്റ്റംസ് ഓഫീസിൽ എത്താൻ സാധ്യതയുണ്ട്.
കസ്റ്റംസിന് പിന്നാലെയാണ് ഇ ഡിയും റെയ്ഡ് നടത്തിയത്. മമ്മൂട്ടിയുടേയും ദുൽഖർ സൽമാന്റെയും വീട്ടിൽ റെയ്ഡ് നടന്നു. പൃഥ്വിരാജ്, അമിത് ചക്കാലക്കൽ എന്നിവരുടെ വീടുകളിലും റെയ്ഡ് നടന്നു. മമ്മൂട്ടിയുടെ കടവന്ത്രയിലെ വീട്ടിലാണ് പരിശോധന. ഒരേസമയം 17 ഇടങ്ങളിലാണ് പരിശോധന നടക്കുന്നത്. ഇത് ഫെമ നിയമ ലംഘനവുമായി ബന്ധപ്പെട്ടാണ് എന്നാണ് ഇ ഡി അറിയിച്ചത്.
ഭൂട്ടാനിൽ നിന്നും ഇന്ത്യയിലേക്ക് അനധികൃതമായി ആഡംബര വാഹനങ്ങൾ കടത്തുന്ന ഒരു സിണ്ടിക്കേറ്റിനെ കുറിച്ചുള്ള വിവരങ്ങളുടെ അടിസ്ഥാനത്തിലാണ് റെയ്ഡ് എന്നാണ് ഇ ഡി പറഞ്ഞത്. ഇത് കോയമ്പത്തൂർ ആസ്ഥാനമായുള്ള വ്യാജ രേഖകൾ ഉപയോഗിച്ചുള്ള ശൃംഖലയാണ്. ഇവർ വാഹനങ്ങൾ സിനിമാ താരങ്ങൾ ഉൾപ്പെടെയുള്ളവർക്ക് കുറഞ്ഞ വിലയ്ക്ക് വിറ്റു. എറണാകുളം, തൃശൂർ, കോഴിക്കോട്, മലപ്പുറം, കോട്ടയം എന്നിവിടങ്ങളിലാണ് പരിശോധന.