കൊച്ചി : ഭൂട്ടാനിൽ നിന്നും അനധികൃതമായി വാഹനങ്ങൾ കടത്തുന്നത് സംബന്ധിച്ചുള്ള പരിശോധനയായ ഓപ്പറേഷൻ നുംഖോർ വഴി പിടിച്ചെടുത്ത തൻ്റെ വാഹനം തിരികെ നൽകണമെന്ന് ആവശ്യപ്പെട്ട് നടൻ ദുൽഖർ സൽമാൻ കസ്റ്റംസിൽ അപേക്ഷ നൽകി. പ്രൊവിഷണൽ റിലീസിനുള്ള അപേക്ഷയാണ് നൽകിയത്. (Dulquer Salmaan on Operation Numkhor)
താൽക്കാലികമായി വാഹനം വിട്ടുകിട്ടണമെന്നാണ് ആവശ്യം. അദ്ദേഹം അഭിഭാഷകൻ വഴി നേരിട്ടാണ് അപേക്ഷ നൽകിയത്. രേഖകൾ പരിശോധിച്ചതിന് ശേഷം ഇക്കാര്യത്തിൽ കസ്റ്റംസ് അഡീഷണൽ കമ്മീഷണർ തീരുമാനം എടുക്കും. ദുൽഖറിന്റെ അപേക്ഷയിൽ 10 ദിവസത്തിനകം തീരുമാനം ഉണ്ടാകണമെന്ന് ഹൈക്കോടതി നിർദേശിച്ചിരുന്നു.
ഈ നീക്കം ഹൈക്കോടതി അനുമതി നൽകിയതിന്റെ അടിസ്ഥാനത്തിലാണ്. അതേമയം, കസ്റ്റംസ് കൂടുതൽ വാഹനങ്ങൾ പിടിച്ചെടുക്കാനുള്ള തീവ്രശ്രമത്തിലാണ്. നേരത്തെ തൻ്റെ ലാൻഡ് റോവർ വിട്ടുനൽകണം എന്നാവശ്യപ്പെട്ട് ദുൽഖർ ഹൈക്കോടതിയെ സമീപിച്ചിരുന്നു. വിശദമായ വാദം കേട്ട കോടതി കസ്റ്റംസ് അഡീഷണർ കമ്മീഷണർ ദുൽഖറിന്റെ ആവശ്യം പരിഗണിക്കണമെന്ന് ഇടക്കാല ഉത്തരവിടുകയും ചെയ്തു.