ചെന്നൈ: സംഗീത സംവിധായകന് ഇളയരാജയുടെ ചിത്രങ്ങളോ, പേരോ, ഗാനങ്ങളോ, സാമ്പത്തിക ലാഭത്തിനായി അനുമതിയില്ലാതെ മറ്റുള്ളവര് ഉപയോഗിക്കുന്നത് താത്കാലികമായി തടഞ്ഞുകൊണ്ടു മദ്രാസ് ഹൈക്കോടതി ഉത്തരവിട്ടു. തന്റെ വ്യക്തിത്വ അവകാശങ്ങള് സംരക്ഷിക്കണമെന്നു ആവശ്യപ്പെട്ടു ഇളയരാജ നല്കിയ ഹര്ജിയിലാണ് ജസ്റ്റിസ് എന് സെന്തില് കുമാറിന്റെ ഇടക്കാല വിധി.
"തന്റെ ചിത്രമോ, പേരോ, കലാസൃഷ്ടികളോ അതേപോലെയോ, തമാശ രൂപത്തിലോ, നിര്മിത ബുദ്ധിയുടെ സഹായത്തോടെയോ യുട്യൂബ് ചാനലുകളിലോ, സമൂഹ മാധ്യമങ്ങളിലോ, മൂന്നാം കക്ഷികള് അനുമതിയില്ലാതെ ഉപയോഗിക്കുന്നത് തടയണം" എന്നാണ് ഇളയരാജ ഹര്ജിയില് ആവശ്യപ്പെട്ടത്.
തന്റെ ചിത്രങ്ങളോ അതിനു സമാനമായ കല്പ്പിത ചിത്രങ്ങളോ തെറ്റിദ്ധാരണ പരത്തുന്ന രൂപത്തില് സാമ്പത്തിക ലാഭത്തിനായി ഉപയോഗിക്കുന്നുണ്ടെന്നു കണ്ടെത്തിയതിന്റെ അടിസ്ഥാനത്തിലാണ് ഈ ആവശ്യമെന്നും ഹര്ജിയില് ചൂണ്ടിക്കാട്ടുന്നു.