കൊച്ചി: പ്രതികരിക്കേണ്ട സാഹചര്യങ്ങളിൽ മുഖം നോക്കാതെ നിലപാടെടുക്കണമെന്ന് നടി ആശ ശരത് (Asha Sharath Interview). തന്റെ നൃത്ത വിദ്യാലയത്തിലെ വിദ്യാർത്ഥിനിയോട് മോശമായി പെരുമാറിയ അധ്യാപകനെ തല്ലിയതായും അയാളെ നിയമത്തിന് മുന്നിൽ എത്തിച്ചതായും താരം വെളിപ്പെടുത്തി. ധന്യ വർമ്മയ്ക്ക് നൽകിയ അഭിമുഖത്തിലാണ് വർഷങ്ങൾക്ക് മുമ്പ് നടന്ന ഈ ഞെട്ടിക്കുന്ന സംഭവം ആശ ശരത് തുറന്നുപറഞ്ഞത്.
ദുബായിലെ തന്റെ നൃത്ത വിദ്യാലയത്തിൽ വെച്ചാണ് സംഭവമുണ്ടായത്. സ്കൂളിലെ ഒരു കുട്ടിയോട് അധ്യാപകൻ മോശമായി പെരുമാറിയെന്ന് കുട്ടിയുടെ രക്ഷിതാവ് വിളിച്ചുപറഞ്ഞു. ആ സമയം നാട്ടിലായിരുന്ന ആശ ഉടൻ തന്നെ ദുബായിലെത്തി.അധ്യാപകനെ നേരിട്ട് വിളിച്ച് കാര്യങ്ങൾ തിരക്കി. ആദ്യം നിഷേധിച്ചെങ്കിലും പിന്നീട് ‘ഞാൻ തുടങ്ങിയതേയുള്ളൂ’ എന്ന് അയാൾ മറുപടി നൽകി.
“ജീവിതത്തിൽ മക്കളെപ്പോലും ഞാൻ അടിച്ചിട്ടില്ല, പക്ഷേ അയാളുടെ മുഖത്ത് എനിക്ക് അടിക്കേണ്ടി വന്നു. ഒരു അധ്യാപകൻ ഇത്തരത്തിൽ പെരുമാറുന്നത് സഹിക്കാനാവില്ല,” ആശ പറഞ്ഞു. കേസ് കൊടുക്കാൻ രക്ഷിതാക്കൾ മടിച്ചെങ്കിലും ആശ ശരത് ഉറച്ചുനിന്നു. പരാതി നൽകിയതിനെത്തുടർന്ന് അയാളെ പോലീസ് അറസ്റ്റ് ചെയ്തു.
തന്റെ മക്കളോടും എന്നും പ്രതികരിക്കാൻ തന്നെയാണ് പഠിപ്പിച്ചിട്ടുള്ളതെന്ന് താരം പറഞ്ഞു. പ്രായം കുറഞ്ഞ കാലത്തല്ല അഭിനയത്തിലേക്ക് വന്നതെന്നതുകൊണ്ട് കാസ്റ്റിംഗ് കൗച്ച് നേരിടേണ്ടി വന്നിട്ടില്ല. തനിക്ക് യോജിക്കാത്ത വസ്ത്രങ്ങൾ ധരിക്കില്ലെന്ന് കൃത്യമായി പറയാറുണ്ട്. അവസരങ്ങൾ നഷ്ടപ്പെടുമെന്ന് ഭയപ്പെട്ട് പെൺകുട്ടികൾ മിണ്ടാതിരിക്കരുത്. പ്രതികരിക്കേണ്ടിടത്ത് പ്രതികരിക്കാൻ മടി കാണിക്കരുതെന്നും അവർ കൂട്ടിച്ചേർത്തു.
സമൂഹത്തിൽ സ്ത്രീകൾ നേരിടുന്ന അതിക്രമങ്ങൾക്കെതിരെ ശക്തമായ നിലപാടെടുക്കണമെന്ന താരത്തിന്റെ വാക്കുകൾ സോഷ്യൽ മീഡിയയിൽ വലിയ ചർച്ചയായിട്ടുണ്ട്.
Story Summary:
Actress Asha Sharath recently revealed a bold incident where she confronted and slapped a teacher at her dance school in Dubai for misbehaving with a student. Speaking in an interview with Dhanya Varma, she emphasized the importance of saying ‘No’ and taking a stand. Despite the parents’ hesitation, Asha insisted on legal action, leading to the teacher’s arrest. She urged young girls not to fear losing opportunities and to speak up against harassment.
