ചെന്നൈ: വെള്ളിത്തിരയിൽ തരംഗം സൃഷ്ടിച്ച ഒട്ടനവധി ചിത്രങ്ങളിലെ നായികയായിരുന്നിട്ടും, സ്വന്തം മക്കൾ തന്റെ ഒരു സിനിമ പോലും ഇതുവരെ കണ്ടിട്ടില്ലെന്ന് നടി ശാലിനി (Actress Shalini). ജെഎഫ്ഡബ്ല്യു മൂവി അവാർഡ്സ് 2026-ന്റെ വേദിയിൽ വെച്ചാണ് താരം ഈ രസകരമായ കാര്യം പങ്കുവെച്ചത്. തന്റെ സിനിമകളിലെ പാട്ടുകൾ മക്കൾ കാണാറുണ്ടെങ്കിലും പൂർണ്ണരൂപത്തിൽ ഒരു ചിത്രം പോലും കാണാൻ അവർ ഇതുവരെ തയ്യാറായിട്ടില്ലെന്ന് ശാലിനി പറഞ്ഞു.
തന്റെ മക്കളായ അനുഷ്കയും ആദ്വിക്കും സിനിമ കാണാൻ മടിക്കുന്നത് തമാശരൂപേണയാണ് താരം വിവരിച്ചത്.
“എന്റെ മക്കൾ ഇതുവരെ എന്റെ ഒരു സിനിമ പോലും കണ്ടിട്ടില്ല. എപ്പോഴെങ്കിലും സിനിമ കാണാം എന്ന് പ്ലാൻ ചെയ്യുമ്പോൾ, നമുക്ക് പിന്നെ കാണാം എന്ന് പറഞ്ഞ് അവർ അത് മാറ്റിവയ്ക്കും. സത്യത്തിൽ ഈ അവസരം ഉപയോഗിച്ച് എനിക്ക് എന്റെ മക്കളോട് ഒരു കാര്യം പറയാനുണ്ട്… മക്കളേ, ദയവുചെയ്ത് എന്റെ ഒരേയൊരു സിനിമയെങ്കിലും നിങ്ങളൊന്ന് കാണുമോ?” – ശാലിനി വേദിയിൽ വെച്ച് ചോദിച്ചു.
തന്റെ ഒരു സിനിമയെക്കുറിച്ച് സുഹൃത്ത് പറഞ്ഞുകേട്ട ആവേശത്തിൽ മകൾ അനുഷ്ക ചിത്രം കാണാൻ താല്പര്യം പ്രകടിപ്പിച്ചിരുന്നെങ്കിലും അതും പിന്നീട് നടക്കാതെ പോയ അനുഭവവും ശാലിനി പങ്കുവെച്ചു.
അജിത്തുമായുള്ള വിവാഹശേഷം സിനിമയിൽ നിന്ന് വിട്ടുനിൽക്കുന്ന ശാലിനി, കുടുംബവിശേഷങ്ങൾ പങ്കുവെച്ച് സോഷ്യൽ മീഡിയയിൽ സജീവമാകാറുണ്ട്. അടുത്തിടെ താരം ഇൻസ്റ്റാഗ്രാമിൽ അക്കൗണ്ട് തുടങ്ങിയതും ആരാധകർ ആഘോഷമാക്കിയിരുന്നു. പ്രിയതാരത്തിന്റെ ഈ തുറന്നുപറച്ചിൽ ആരാധകർക്കിടയിൽ വലിയ ചിരി പടർത്തിയിരിക്കുകയാണ്. അജിത്തിനെയും ശാലിനിയെയും വെള്ളിത്തിരയിൽ കണ്ട മലയാളികളും തമിഴകവും ഈ ‘സിനിമ കാണാതിരിക്കൽ’ അവിശ്വസനീയതയോടെയാണ് കേട്ടുനിന്നത്.
Story Summary:
Actress Shalini revealed at the JFW Movie Awards 2026 that her children, Anushka and Aadvik, have never watched any of her movies in full. Though they enjoy her songs, they often postpone watching her films despite several plans.
