ന്യൂഡൽഹി: യൂണിയൻ പബ്ലിക് സർവീസ് കമ്മീഷൻ (UPSC) 2025 ൽ നടത്തിയ സിവിൽ സർവീസസ് പ്രിലിമിനറി പരീക്ഷയുടെ ഫലം പുറത്തു വന്നു(UPSC 2025). സിവിൽ സർവീസസ് പ്രിലിമിനറി പരീക്ഷാഫലം ഔദ്യോഗിക വെബ്‌സൈറ്റായ upsc.gov.in-ൽ പരിശോധിക്കാവുന്നതാണ്.
2025 മെയ് 26 ന് നടന്ന പരീക്ഷയിൽ രണ്ട് ഷിഫ്റ്റുകളിലായി പത്ത് ലക്ഷത്തിലധികം വിദ്യാർത്ഥികൾ പരീക്ഷ എഴുതിയിരുന്നു. വിവിധ പൊതു സേവന വകുപ്പുകളിലായി 979 തസ്തികകൾ നികത്തുന്നതിനാണ് പരീക്ഷ നടത്തിയത്. പ്രിലിമിനറി പരീക്ഷയിൽ വിജയിച്ച ഉദ്യോഗാർത്ഥികൾ ഫലം പുറത്തിറങ്ങിയ ഉടൻ തന്നെ ലഭ്യമാകുന്ന വിശദമായ അപേക്ഷാ ഫോം-I (DAF-I) സമർപ്പിക്കണം. സിവിൽ സർവീസസ് മെയിൻസ് പരീക്ഷയ്ക്ക് ഇത് ആവശ്യമാണ്.
അതേസമയം, 2025-ലെ CDS II, NDA/NA II പരീക്ഷകൾക്കുള്ള രജിസ്ട്രേഷനുകൾ UPSC സ്വീകരിച്ചു തുടങ്ങി. താൽപ്പര്യമുള്ള അപേക്ഷകർ ജൂൺ 17-നകം upsconline.nic.in എന്ന വിലാസത്തിൽ അപേക്ഷ സമർപ്പിക്കണം. ഇത് സംബന്ധിച്ച പരീക്ഷകൾ സെപ്റ്റംബർ 14-ന് നടക്കും.