ന്യൂഡൽഹി: നീറ്റ് പരീക്ഷാ പേപ്പർ ചോർച്ച വിവാദത്തിലും രാജ്യത്തെ പരീക്ഷാ ക്രമക്കേടുകളിലും പ്രതിഷേധിച്ച് നിരാഹാര സമരം നടത്തിവന്ന പരിസ്ഥിതി പ്രവർത്തകൻ സോനം വാങ്ചുകിനെ ജന്തർ മന്ദിറിൽ നിന്ന് പോലീസ് ബലമായി നീക്കിയ നടപടിയെ കടുത്ത ഭാഷയിൽ വിമർശിച്ച് കോൺഗ്രസ് അധ്യക്ഷൻ മല്ലികാർജുൻ ഖാർഗെ. ജന്തർ മന്ദിറിൽ ശനിയാഴ്ച നടന്നത് ജനാധിപത്യത്തിനും ഇന്ത്യൻ ഭരണഘടനയ്ക്കും മേലേറ്റ കരിനിഴലാണെന്ന് അദ്ദേഹം ആരോപിച്ചു. കേന്ദ്ര ഭരണകൂടത്തിനെതിരെ ശബ്ദമുയർത്തുന്ന ഏത് വിഭാഗത്തെയും അടിച്ചമർത്തുന്ന സമീപനമാണ് മോദി സർക്കാരിന്റേതെന്നും അദ്ദേഹം എക്സ് കുറിപ്പിൽ വ്യക്തമാക്കി.(Mallikarjun Kharge Criticises Central Government Over Delhi Police Action Against Sonam Wangchuk)
വിദ്യാഭ്യാസ മന്ത്രി ധർമേന്ദ്ര പ്രധാന്റെ രാജി ആവശ്യപ്പെട്ട് സമരം ചെയ്തിരുന്ന വാങ്ചുകിന്റെ ആരോഗ്യം വഷളായതിനെ തുടർന്ന് ഡൽഹി ഹൈക്കോടതിയുടെ നിർദ്ദേശപ്രകാരമാണ് സഫ്ദർജംഗ് ആശുപത്രിയിലേക്ക് മാറ്റിയതെന്നാണ് പോലീസ് നൽകുന്ന വിശദീകരണം. എന്നാൽ ഇത് സമരത്തെ അട്ടിമറിക്കാനുള്ള നീക്കമാണെന്ന് പ്രതിപക്ഷം കുറ്റപ്പെടുത്തി. കർഷകർ, വിദ്യാർത്ഥികൾ, ഒളിമ്പിക് ഗുസ്തി താരങ്ങൾ, ദലിതർ, ആദിവാസികൾ എന്നിങ്ങനെ നീതിക്കായി തെരുവിൽ ഇറങ്ങിയ ആരെയും ഈ സ്വേച്ഛാധിപത്യ സർക്കാർ വെറുതെ വിട്ടിട്ടില്ലെന്ന് ഖാർഗെ ചൂണ്ടിക്കാട്ടി.
അധികാരികൾക്ക് മുന്നിൽ അവകാശങ്ങൾ ചോദിക്കുന്നവർ ഭരണകൂടത്തിന്റെ കണ്ണിൽ ‘ദേശവിരുദ്ധരും’ ‘പരാദങ്ങളുമാണ്’. ഗംഗാ നദിയെ സംരക്ഷിക്കാൻ 111 ദിവസം നിരാഹാരം ഇരുന്ന് രക്തസാക്ഷിത്വം വരിച്ച പ്രൊഫ. ജി.ഡി. അഗർവാളിനെയും സമരം ചെയ്ത കർഷകരെയും ഖാർഗെ കുറിപ്പിൽ അനുസ്മരിച്ചു. പേപ്പർ ചോർച്ച കാരണം ജീവനൊടുക്കേണ്ടി വന്ന 25 കുട്ടികളുടെ കുടുംബങ്ങളുടെ കണ്ണീരിന് രാജ്യം മറുപടി പറയേണ്ടതുണ്ടെന്നും കോട്ടയിലും ഡെറാഡൂണിലും ആരംഭിച്ച വിദ്യാർത്ഥി പ്രതിരോധം വൈകാതെ ഡൽഹിയുടെ വാതിലുകളിൽ എത്തിച്ചേരുമെന്നും അദ്ദേഹം മുന്നറിയിപ്പ് നൽകി. വാങ്ചുകിനെ മാറ്റിയെങ്കിലും സമരം തുടരുമെന്നും താൻ അനിശ്ചിതകാല നിരാഹാരം ആരംഭിക്കുകയാണെന്നും കോക്രോച്ച് ജനതാ പാർട്ടി സ്ഥാപകൻ അഭിജീത് ദിപ്കെ പ്രഖ്യാപിച്ചു.
Story Summary
Congress President Mallikarjun Kharge strongly condemned the Delhi Police’s action against climate activist Sonam Wangchuk at Jantar Mantar, calling it a black stain on democracy. Wangchuk, who was on a hunger strike demanding the Education Minister’s resignation over the NEET paper leak, was forcibly shifted to Safdarjung Hospital following health concerns.
