കാഠ്മണ്ഡു: നേപ്പാൾ തലസ്ഥാനമായ കാഠ്മണ്ഡുവിൽ വൻ ഭൂരിപക്ഷത്തോടെ അധികാരത്തിലേറിയ ജനപ്രിയ മേയർ ബാലേന്ദ്ര ഷായുടെ (ബാലൻ ഷാ) ഭരണകൂടത്തിനെതിരെ ജനരോഷം ശക്തമാകുന്നു (Kathmandu youth protest news). നഗരത്തിൽ ഒരു ബൈക്ക് ടാക്സി ഡ്രൈവർ ആത്മഹത്യ ചെയ്ത ദരുണ സംഭവമാണ് കാഠ്മണ്ഡുവിൽ പെട്ടന്നുള്ള വൻ യുവജന പ്രതിഷേധത്തിന് വഴിവെച്ചത്. ഗണേഷ് നേപ്പാളി (25) എന്ന സാധാരണക്കാരനായ ഡ്രൈവർ, കാഠ്മണ്ഡു മുനിസിപ്പൽ പോലീസ് തന്റെ മോട്ടോർ സൈക്കിളിന്റെ ചക്രം ലോക്ക് ചെയ്തതിൽ പ്രതിഷേധിച്ച് സ്വയം തീകൊളുത്തുകയായിരുന്നു.
കഴിഞ്ഞ വ്യാഴാഴ്ച റോഡരികിൽ യാത്രക്കാരെ കാത്തുനിന്ന ഗണേഷിന്റെ ബൈക്കിന് മുനിസിപ്പൽ പോലീസ് ചക്രപ്പൂട്ടിടുകയായിരുന്നു (Wheel lock). ഇതിൽ കടുത്ത മനംനൊന്ത യുവാവ് പെട്രോളൊഴിച്ച് തീകൊളുത്തുകയും, വെള്ളിയാഴ്ച ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലിരിക്കെ മരണത്തിന് കീഴടങ്ങുകയുമായിരുന്നു. ഈ ക്രൂരത പുറത്തറിഞ്ഞതോടെയാണ് നഗര ഭരണകൂടത്തിന്റെ മനുഷ്യത്വരഹിതമായ നടപടികൾക്കെതിരെയുള്ള ജനങ്ങളുടെ പ്രതിഷേധം തെരുവ് യുദ്ധമായി മാറിയത്.
കാഠ്മണ്ഡുവിലെ മുനിസിപ്പൽ സെക്രട്ടേറിയറ്റിന് മുന്നിൽ ഞായറാഴ്ച നൂറുകണക്കിന് യുവാക്കളും വിദ്യാർത്ഥികളുമാണ് പ്രതിഷേധവുമായി ഒത്തുചേർന്നത്. ‘പാവപ്പെട്ടവരോടുള്ള ക്രൂരത അവസാനിപ്പിക്കുക’, ‘സാധാരണക്കാരുടെ മനുഷ്യാവകാശങ്ങളെ മാനിക്കുക’ തുടങ്ങിയ ശക്തമായ മുദ്രാവാക്യങ്ങൾ എഴുതിയ പ്ലക്കാർഡുകളുമായായിരുന്നു പ്രതിഷേധം. ചേരികളിൽ താമസിക്കുന്ന നിർധനരായ ജനങ്ങളെ ബലംപ്രയോഗിച്ച് കുടിയൊഴിപ്പിക്കുന്ന നടപടികൾ ഉടനടി നിർത്തണമെന്നും, പോലീസിന്റെ അനധികൃത അറസ്റ്റുകൾ അവസാനിപ്പിക്കണമെന്നും പ്രതിഷേധക്കാർ കടുത്ത ഭാഷയിൽ ആവശ്യപ്പെട്ടു.
കഴിഞ്ഞ 2022-ൽ സ്വതന്ത്ര സ്ഥാനാർത്ഥിയായി മത്സരിച്ച് വൻ ഭൂരിപക്ഷത്തോടെ മേയറായി തിരഞ്ഞെടുക്കപ്പെട്ട ബാലൻ ഷായുടെ നഗര പരിപാലന രീതികൾ നേരത്തെ തന്നെ വലിയ വിവാദത്തിലായിരുന്നു. നഗര സൗന്ദര്യവൽക്കരണത്തിന്റെ പേരിൽ തെരുവ് കച്ചവടക്കാരെ ക്രൂരമായി ഒഴിപ്പിക്കുന്നതിനും നദീതീരങ്ങളിലെ പാവപ്പെട്ടവരുടെ കുടിയേറ്റങ്ങൾ തല്ലിപ്പൊളിക്കുന്നതിനും അദ്ദേഹം സ്വീകരിക്കുന്ന കടുത്ത നിലപാടുകൾക്കെതിരേ നഗരത്തിൽ ഇതിനകം പ്രതിഷേധം പുകയുന്നുണ്ടായിരുന്നു. പലപ്പോഴും ഇത്തരം ഒഴിപ്പിക്കൽ നടപടികൾ പോലീസും ജനങ്ങളും തമ്മിലുള്ള വലിയ സംഘർഷങ്ങളിലാണ് അവസാനിച്ചിട്ടുള്ളത്.
Story Summary: Protests erupted in Kathmandu against Mayor Balendra Shah following the tragic suicide of a 25-year-old bike taxi driver, Ganesh Nepali. The driver set himself on fire after municipal police locked his motorcycle wheel and later succumbed to injuries, fueling public anger over the administration’s strict actions against street vendors and slum dwellers.
