മുംബൈ: സുഹൃത്തുക്കൾക്കൊപ്പം അപ്പാർട്ട്മെന്റിൽ ഒളിച്ചുപൊത്തി കളിക്കുന്നതിനിടെ ലിഫ്റ്റിന്റെ ഷാഫ്റ്റിലേക്ക് (Mumbai Nehru Nagar Lift Accident) വീണ് 12 വയസ്സുകാരന് ദാരുണാന്ത്യം. മുംബൈ സ്വദേശിയായ ജെയിൻ ഷെയ്ഖ് എന്ന കുട്ടിയാണ് മരിച്ചത്. മുംബൈയിലെ നെഹ്റു നഗറിലുള്ള ഫ്ലാറ്റ് സമുച്ചയത്തിൽ തിങ്കളാഴ്ച രാത്രിയായിരുന്നു മനസ്സാക്ഷിയെ നടുക്കിയ ഈ ദാരുണ സംഭവം നടന്നത്.
കൂട്ടുകാരോടൊപ്പം ഒളിച്ചുരസിക്കുന്നതിനിടെ ലിഫ്റ്റിന് സമീപം ഒളിക്കാൻ ശ്രമിച്ചതായിരുന്നു ജെയിൻ. ലിഫ്റ്റിന്റെ പുറംവാതിലിൽ ചാരി നിൽക്കുന്നതിനിടെ തകരാറിലായിരുന്ന വാതിൽ പെട്ടെന്ന് തനിയെ തുറക്കുകയായിരുന്നു. ആ സമയം ലിഫ്റ്റ് കാബിൻ കെട്ടിടത്തിന്റെ മൂന്നാം നിലയിലായിരുന്നു. പത്താം നിലയിൽ നിന്നും താഴേക്ക് പതിച്ച ജെയിൻ മൂന്നാം നിലയിൽ നിർത്തിയിട്ടിരുന്ന ലിഫ്റ്റ് കാബിന്റെ മുകളിലേക്കാണ് വീണത്. വീഴ്ചയുടെ ആഘാതത്തിൽ ഗുരുതരമായി പരിക്കേറ്റ കുട്ടിയെ സുഹൃത്തുക്കളും ഫ്ലാറ്റിലെ താമസക്കാരും ചേർന്ന് ഉടൻ തന്നെ സമീപത്തെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
7 മാസമായി തുടർന്ന സാങ്കേതിക തകരാർ
കെട്ടിടത്തിലെ ലിഫ്റ്റിന് കഴിഞ്ഞ ഏഴ് മാസമായി ഗുരുതരമായ സാങ്കേതിക തകരാറുകൾ ഉണ്ടായിരുന്നുവെന്ന് ഫ്ലാറ്റിലെ താമസക്കാർ ആരോപിക്കുന്നു. ലിഫ്റ്റ് കാബിൻ കൃത്യമായ ഫ്ലോറിൽ എത്തുന്നതിന് മുൻപ് തന്നെ പുറത്തെ സുരക്ഷാ വാതിൽ തുറക്കാവുന്ന തരത്തിലുള്ള സാങ്കേതിക പിഴവാണ് ദുരന്തത്തിന് കാരണമായത്. ഫ്ലാറ്റ് അസോസിയേഷന്റെയും മെയിന്റനൻസ് ജീവനക്കാരുടെയും ഭാഗത്തുനിന്നുണ്ടായ ഗുരുതരമായ വീഴ്ചയാണിതെന്നാണ് ഉയരുന്ന ആക്ഷേപം. സംഭവത്തിൽ നെഹ്റു നഗർ പോലീസ് നിലവിൽ അസ്വാഭാവിക മരണത്തിന് കേസ് രജിസ്റ്റർ ചെയ്യുകയും, ലിഫ്റ്റിന്റെ അറ്റകുറ്റപ്പണിയിൽ വീഴ്ച വരുത്തിയവർക്കെതിരെ വിശദമായ അന്വേഷണം ആരംഭിക്കുകയും ചെയ്തിട്ടുണ്ട്.
Story Summary:
A 12-year-old boy named Jain Sheikh tragically died after falling into an apartment lift shaft while playing hide-and-seek with friends in Mumbai’s Nehru Nagar. The accident occurred when he leaned against the lift door on the 10th floor, which unexpectedly opened due to a technical snag, causing him to fall onto the roof of the lift cabin parked on the 3rd floor. Residents alleged that the elevator had experienced technical issues for the past seven months, and the Nehru Nagar police have registered a case of accidental death to probe into maintenance negligence.
