ന്യൂഡൽഹി: തെക്കൻ ഡൽഹിയിലെ ലോധീ കോളനിയിലെ റെസിഡൻഷ്യൽ സൊസൈറ്റി വളപ്പിൽ 28-കാരിയായ യുവതിയെ ദുരൂഹ സാഹചര്യത്തിൽ മരിച്ച നിലയിൽ കണ്ടെത്തി. പുഷ്പ് വിഹാർ സ്വദേശിനിയും ഛത്തർപൂരിലെ സ്വകാര്യ കമ്പനിയിൽ സെയിൽസ് എക്സിക്യൂട്ടീവുമായ ആകൃതി സുതാർ ആണ് മരിച്ചത്. കഴിഞ്ഞ ശനിയാഴ്ച രാത്രി ഒൻപത് മണിയോടെയായിരുന്നു സംഭവം.(Delhi Woman Found Dead Two Months After Wedding Family Alleges Dowry Murder)
കെട്ടിടത്തിന്റെ മുകളിൽ നിന്ന് വീണ നിലയിലാണ് മൃതദേഹം കണ്ടെത്തിയത്. എന്നാൽ ആകൃതിയുടേത് ആത്മഹത്യയല്ലെന്നും ഭർത്താവും വീട്ടുകാരും ചേർന്ന് നടത്തിയ കൊലപാതകമാണെന്നും ആരോപിച്ച് യുവതിയുടെ കുടുംബം രംഗത്തെത്തി. എട്ട് വർഷത്തെ പ്രണയത്തിനൊടുവിൽ കഴിഞ്ഞ ഏപ്രിൽ 24-നായിരുന്നു ആകൃതിയും അരാസ്തു സിക്കയും തമ്മിലുള്ള വിവാഹം നടന്നത്. നിലവിൽ അരാസ്തുവിന് ജോലിയൊന്നുമില്ല. വിവാഹത്തിന് ശേഷം അരാസ്തുവും കുടുംബവും 20 ലക്ഷം രൂപ സ്ത്രീധനം ആവശ്യപ്പെട്ട് ആകൃതിയെ നിരന്തരം മാനസികമായും ശാരീരികമായും പീഡിപ്പിച്ചിരുന്നതായി കുടുംബം ആരോപിക്കുന്നു.
ആകൃതി ഒരിക്കലും ആത്മഹത്യ ചെയ്യില്ലെന്നും മാനസികമായി ഏറെ കരുത്തുള്ള പെൺകുട്ടിയായിരുന്നു അവളെന്നും സഹോദരൻ അമയ് സുതാർ പറഞ്ഞു. വിവാഹത്തിന് ശേഷം അവധിയിലായിരുന്ന ആകൃതി ശനിയാഴ്ചയാണ് തിരികെ ജോലിയിൽ പ്രവേശിച്ചത്. ഓഫീസിലെ സഹപ്രവർത്തകർക്കായി അവർ ചെറിയൊരു പാർട്ടി നൽകുകയും ചെയ്തിരുന്നു. മരണത്തിന് തൊട്ടുമുമ്പ് വൈകുന്നേരം ആറ് മണിയോടെയും ആകൃതി അമ്മയുമായി ഫോണിൽ സംസാരിച്ചിരുന്നു. ഓഫീസിലെ പാർട്ടിയെക്കുറിച്ചും താൻ വീട്ടിലേക്ക് മടങ്ങുകയാണെന്നുമാണ് അവർ പറഞ്ഞത്. വളരെ സാധാരണ രീതിയിലാണ് അവർ സംസാരിച്ചതെന്നും അമ്മ വ്യക്തമാക്കുന്നു.
എന്നാൽ എട്ട് മണിയോടെ ആകൃതിയെ കാണാനില്ലെന്ന് പറഞ്ഞ് ഭർത്താവ് അരാസ്തു കുടുംബത്തെ വിളിക്കുകയായിരുന്നുവെന്ന് ആകൃതിയുടെ അമ്മാവൻ മനഞ്ജയ് സുതാർ പറഞ്ഞു. ഇതിന് പിന്നാലെ ഏകദേശം ഒന്നര മണിക്കൂറിനുള്ളിൽ പാലികാ കുഞ്ചിൽ ഒരു യുവതിയുടെ മൃതദേഹം കണ്ടെത്തിയതായി പോലീസ് കുടുംബത്തെ അറിയിക്കുകയായിരുന്നു. വീട്ടിൽ നിന്നും 10 കിലോമീറ്റർ അകലെയുള്ള കെട്ടിടത്തിലാണ് മൃതദേഹം കണ്ടെത്തിയത്.
Story Summary
A 28-year-old woman, Akriti Sutar, was found dead after allegedly falling from a residential building in Delhi’s Lodhi Colony on Saturday night, just two months after her wedding. Her family has rejected suicide claims, alleging she was murdered by her unemployed husband, Arastu Sikka, and his family, who had been harassing her for Rs 20 lakh in dowry.
