വാഷിങ്ടൺ: ഫുട്ബോൾ ലോകകപ്പിന്റെ ചരിത്രതാളുകളിൽ സുവർണ്ണാക്ഷരങ്ങളാൽ വീണ്ടുമൊരു ഇതിഹാസ റെക്കോഡ് കൂടി കുറിച്ച് പോർച്ചുഗീസ് സൂപ്പർതാരം ക്രിസ്റ്റ്യാനോ റൊണാൾഡോ (Cristiano Ronaldo 6 World Cups goal record). മെക്സിക്കോ, കാനഡ, അമേരിക്ക എന്നീ രാജ്യങ്ങൾ സംയുക്തമായി ആതിഥേയത്വം വഹിക്കുന്ന 2026 ലോകകപ്പിലെ ഗ്രൂപ്പ് ഘട്ട മത്സരത്തിൽ ഉസ്ബെക്കിസ്താനെതിരേ ഗോൾ നേടിയതോടെ, ലോക ഫുട്ബോൾ ചരിത്രത്തിൽ ആറു ലോകകപ്പുകളിൽ ഗോൾ നേടുന്ന ലോകത്തിലെ ആദ്യത്തെ താരമെന്ന അവിശ്വസനീയ റെക്കോഡ് റോണോ സ്വന്തമാക്കി. തന്റെ കരിയറിലെ ആദ്യ ലോകകപ്പായ 2006 മുതൽ ഈ 2026 ലോകകപ്പ് വരെ പങ്കെടുത്ത എല്ലാ പതിപ്പുകളിലും (2006, 2010, 2014, 2018, 2022, 2026) പോർച്ചുഗലിനായി ഗോൾ നേടാൻ ക്രിസ്റ്റ്യാനോയ്ക്ക് സാധിച്ചു.
ഉസ്ബെക്കിസ്താനെതിരെയുള്ള മത്സരത്തിന്റെ ആറാം മിനിറ്റിൽ തന്നെയായിരുന്നു റൊണാൾഡോയുടെ ആ ചരിത്ര നിമിഷം പിറന്നത്. വലതുവിങ്ങിൽ നിന്ന് സഹതാരം ജാവോ കാൻസലോ നൽകിയ കൃത്യതയാർന്ന മനോഹരമായ ക്രോസ്സ്, ബോക്സിനുള്ളിൽ വെച്ച് ഒരു തകർപ്പൻ വോളി ഷോട്ടിലൂടെ റൊണാൾഡോ വലയിലെത്തിക്കുകയായിരുന്നു. റൊണാൾഡോയുടെ മിന്നൽ വേഗതയിലുള്ള ഷോട്ടിന് മുന്നിൽ ഉസ്ബെക്കിസ്താൻ ഗോളിക്ക് കേവലം ഒരു കാഴ്ചക്കാരനായി നിൽക്കാനേ സാധിച്ചുള്ളൂ. ഈ തകർപ്പൻ ഗോളോടെയാണ് ആറു ലോകകപ്പുകളിലും ഗോൾ നേടുന്ന താരമെന്ന ചരിത്ര റെക്കോഡ് താരം സ്വന്തം പേരിലേക്ക് മാറ്റിയെഴുതിയത്. ഈ ലോകകപ്പ് പതിപ്പിൽ ക്രിസ്റ്റ്യാനോയുടെ ആദ്യ ഗോളാണിത്.
ഈ ഗോളോടെ ലോകകപ്പ് ചരിത്രത്തിൽ പോർച്ചുഗലിനായി ഏറ്റവും കൂടുതൽ ഗോൾ നേടുന്ന താരമെന്ന റെക്കോഡിൽ കറുത്ത മുത്ത് എന്നറിയപ്പെടുന്ന അന്തരിച്ച ഇതിഹാസതാരം യുസേബിയോക്കൊപ്പമെത്താനും (Eusebio) ക്രിസ്റ്റ്യാനോയ്ക്കായി. ലോകകപ്പുകളിൽ ഇരുവർക്കും ഇപ്പോൾ ഒൻപത് ഗോളുകൾ വീതമാണുള്ളത്. വരും മത്സരങ്ങളിൽ ഇനി ഒരു ഗോൾ കൂടി നേടിയാൽ പോർച്ചുഗലിന്റെ ലോകകപ്പ് ചരിത്രത്തിലെ ഏറ്റവും വലിയ ഗോൾവേട്ടക്കാരനായി യുസേബിയോയെ മറികടന്ന് റൊണാൾഡോയ്ക്ക് ഒറ്റയ്ക്ക് ഒന്നാമതെത്താം.
ഇതിനുപുറമേ, ലോകകപ്പ് ചരിത്രത്തിലെ ഏറ്റവും പ്രായം കൂടിയ രണ്ടാമത്തെ ഗോൾ സ്കോറർ എന്ന പദവിയും 41 വയസ്സും 138 ദിവസവും പ്രായമുള്ള റോണോ സ്വന്തമാക്കി. ലോകകപ്പ് ചരിത്രത്തിലെ ഏറ്റവും പ്രായം കൂടിയ ഗോൾ സ്കോറർ എന്ന റെക്കോഡ് ഇപ്പോഴും മുൻ കാമറൂൺ ഇതിഹാസ താരം റോജർ മില്ലയുടെ (Roger Milla) പേരിലാണ് ഭദ്രം. 1994-ൽ അമേരിക്കയിൽ വെച്ച് നടന്ന ലോകകപ്പിൽ റഷ്യക്കെതിരേ ഗോൾ നേടുമ്പോൾ 42 വയസ്സും 39 ദിവസവുമായിരുന്നു റോജർ മില്ലയുടെ പ്രായം.
Story Summary: Cristiano Ronaldo scripted football history by becoming the first player to score in six consecutive World Cups (2006 to 2026), after netting a goal against Uzbekistan in the 6th minute off a Joao Cancelo cross. With this 9th World Cup goal, he equaled the legendary Eusebio’s record for most World Cup goals scored for Portugal. At 41 years and 138 days old, Ronaldo also became the second-oldest goalscorer in World Cup history, trailing only Cameroon’s Roger Milla, who scored at the age of 42 during the 1994 World Cup.
